अनिदो सपना
बादलको घेरो सितको थोपा जुन छैन रातमा।
सम्झना आउँछ रमाइलो पलको पसिना हातमा।।
सपना आउँछन् हरेक पल अनिदो आखाँमा।
अनिदो सपना सुनाउन मन छ यो झ्याउरे भाकामा।।
पानीमा माछी डालीमा चरी छ फुल हाँसेको।
त्यसैले होला त्यो पारी बनमा मयुर नाचेको।।
उर्लेर आउँदा मनको आधी छेकेन आँखाले ।
अनिदो सपना सुनाउन मन छ यो झ्याउरे भाकाले।।
रहर हैन बाध्यता जीवन धर्तिको पाहुना।
कसले पो सक्छ र सोचे झै जीवन चाहे झै बनाउन।।
नजाउन टाढा हे मेरी आमा बसिदेउ आँखामा ।
अनिदो सपना सुनाउन मन छ यो झ्याउरे भाकामा।।
बनाउँछ बाटो पानीले आफै समुन्द्र भेटाउन।
मनको लक्ष्य सकिन्छ कहाँ सजिलै भेटाउन।।
चर्कदा मन आउँदो हो आँसु सुटुक्क आँखामा ।
अनिदो सपना सुनाउन मन छ यो झ्याउरे भाकामा ।।
👉अम्बिका भण्डारी, अन्नपूर्ण २ कास्की
Posts
