पोखरा , साउन ३० गते । पोखरामा छुट्टाछुट्टै स्थानका तिन बालिका बेपत्ता भएको खबर छ ।
विद्यालय हिँडेको तर घर नफर्केको भन्दै बालिकाहरूको खोजी गरिदिन भन्दै परिवारले प्रहरीमा उजुरी दिएको हो ।
गत साउन १९ गते विद्यालय जान्छु भनी हिँडेका बालिका हराएपछि परिवारले खोजीका लागि सम्बन्धित सबैलाई अनुरोध गरेका छन् ।
पोखरा महानगरपालिका–२ विन्ध्यवासिनीका १४ वर्षीय मनिका, १३ वर्षीय एलिसा र १४ वर्षीय राधिका परियार सम्पर्कविहीन भएका हुन् ।
तीनै जना बालिका हालसम्म पनि फेला नपरेको जिल्ला प्रहरी कार्यालय कास्कीले जनाएको छ ।
पारिवारिक स्रोतका अनुसार उनीहरू उक्त दिन विद्यालय जाने भनेर हिँडे पनि विद्यालय चाहिँ नपुगेको बुझिएको छ ।
हराएका बालिकाहरूमध्ये राधिका र मनिका राष्ट्रिय माध्यमिक विद्यालय र एलिसा बर पाटन माध्यमिक विद्यालयमा अध्ययनरत विद्यार्थी हुन् ।
राधिका र मनीकाका अभिभावकले दिएको जानकारी अनुसार सविस्तार कुरा हुन नपाएपनि एकपटक फोनमा कुरा भएको बताइएको छ । तर उनीहरू कहाँ कुन अवस्थामा छन् भन्ने कुरा भने अज्ञात रहेको छ ।
आफन्त, इष्टमित्रसमेतको सम्पर्कमा नआएको हुँदा खोजतलास गरी पाऊ भन्दै परिवारले जिल्ला प्रहरी कार्यालयमा निवेदन दिएपछि खोजी कार्यलाई तीव्र पारिएको प्रहरीले जनाएको छ ।
परिवारका अनुसार बालिका हराउँदाको बखत विद्यालयको पोसाक सेतो सर्ट र निलो स्कट लगाएका थिए ।
यता प्रहरीले एक सूचना जारी गर्दै भेट्ने जो कोहीले पनि नजिकको प्रहरी कार्यालयमा सम्पर्क गरिदिन आग्रह गरेको छ ।
Posts
