डिआर काफ्ले,
पोखरा, स्याङ्जाको अर्जुनचौपारी गाउँपालिका वडा नम्बर ४ स्थित जना मा वि रापाकोटमा कार्यरत शिक्षक नारायण प्रसाद पौडेलको दुवै मिर्गौलामा समस्या देखिएपछि उपचारमा आर्थिक समस्या देखिएको छ ।
लामो समयदेखि सुगरको रोगी रहेको र औषधि सेवन गर्दै आइरहनु भएका शिक्षक पौडेललाई आर्थिक अभाव भएकै कारण विभिन्न निकायले उपचारमा सहयोग होस् भन्ने उद्देश्यले यति बेला सहयोग सङ्कलन एवं सहयोगको आह्वान गरिरहेका छन् ।
३६ वर्षको उमेरमा विगत ४ महिनादेखि मिर्गौला फेल भएर कठिन समयबाट गुज्रिरहेका शिक्षक पौडेललाई उपचारमा धेरै धनराशि खर्च भइसकेको र अझै थप उपचारको लागि आर्थिक स्रोतको अभाव भएको उहाँको परिवारले जनाएको छ ।
पारिवरका अनुसार शिक्षक पौडेललाई उहाँकै श्रीमती भीम कुमारी पौडेलले मिर्गौला दान गर्नुभएको छ । मिर्गौला प्रत्यारोपण सफल भएको बताउँदै थप उपचारको लागि आर्थिक अभाव भएकोले सहयोगी मनहरू समक्ष परिवारले सहयोगको अपिल गरेको हो ।
यता उहाँले अध्यापन गराउने विद्यालयले पनि आर्थिक स्रोत जुटाउन पहल गरिरहेको बताएको छ । विद्यालयका प्राचार्य आत्मराम चापागाईँको सक्रियतामा सहयोग सङ्कलनमा लागेको विद्यालयले जनाएको छ । विद्यालयका प्राचार्य चापागाईँका अनुसार अहिले सम्म करिब ५ लाख ५० हजार रुपैयाँ र कोरियामा रहेका दाजुभाइ बाट ३ लाख रकम सङ्कलन समेत भइसकेको छ ।
त्यस्तै यता जन मा वि कि रापाकोटकी पूर्व शिक्षिका एवम् हाल सिद्धार्थ मा वि फेदी खोला स्याङ्जामा अध्यापन गराउँदै आउनुभएकी शिक्षिका जमुना चापागाईँ काफ्लेको सक्रियतामा विद्यालयका शिक्षक शिक्षिकाहरूबाट १५ हजार ८ सय ५० रुपैयाँ सङ्कलन भएको खबर हामीलाई प्राप्त भएको छ ।
मिर्गौला प्रत्यारोपण पश्चात् हाल उहाँको सहिद धर्मभक्त अस्पतालमा उपचार भइरहेको छ ।
.png)
.png)
.jpg)
.png)
.jpeg)
Posts
