.jpg)
पोखरा- कास्की प्रहरीले मोबाइल चोरी गर्ने एक जनालाई पक्राउ गरेको छ । अङ्ग्रेजी नयाँ वर्षको दिनमा पोखरा महानगरपालिका वडा नं. ६ लेकसाईडमा एक जना महिलाले भिरेको झोलाबाट आईफोन चोरी गरी सिम कार्ड राखी प्रयोग गरी चलाउँदै आएका म्याग्दी अन्नपूर्ण गाउँपालिका वडा नं. १ दाना स्थायी घर भई हाल जिल्ला कास्की पोखरा महानगरपालिका वडा नं. ८ जाल्पारोड बस्ने वर्ष २० को रुपेश रम्जालीलाई प्रहरीले पक्राउ गरेको हो ।
गत वर्ष चैत २० गते पोखरा महानगरपालिका वडा नं. ८ सभागृहमा सहकारी दिवसको दिनमा भएको कार्यक्रममा टेबुलमाथि राखेको सामुसङ मोबाइल चोरी गरी लगेको र उक्त मोबाइलमा रहेको ई सेवा आइडी समेत ह्याक गरी नगद रु.१८,१२५ रुपैयाँ ट्रान्सफर गरेको भन्ने जाहेरी जिल्ला प्रहरी कार्यालय कास्कीमा परेको थियो ।
सोही जाहेरीको आधारमा प्रहरीले अनुसन्धान तथा खोजतलास गर्दै जाँदा रम्जालीलाई प्रहरीले पक्राउ गरेको हो । उनले उक्त मोबाइल फोनमा आफ्नो सिम कार्ड हाली चलाएको भेटिएको प्रहरीले जनाएको छ ।
प्रहरीका अनुसार निजले हालसम्म विभिन्न कम्पनीका १५/१६ वटा मोबाइल चोरी गरी फेसबुकमा बिक्रीको लागि राख्ने र बिक्री पश्चात् उक्त फेसबुक आइडी डिलिट गर्ने गरेको भन्ने प्रारम्भिक सोधपुछको क्रममा थाहा लागेको छ ।
रम्जालीलाई कास्की जिल्ला अदालतबाट चोरी तथा डाँका सम्बन्धी मुद्दामा ७ दिन म्याद थप गरी अनुसन्धान प्रक्रिया अगाडी बढाइएको छ ।
Posts
