स्याङ्जा - स्याङ्जाको अर्जुनचौपारी गाउँपालिका वडा नम्बर ५ का नारायण प्रसाद खनालको मृत शरीर ज्यान गएको ३ महिनापछि स्वदेश आइपुगेको छ ।
परिवारको गुजारा चलाउन भनी केही समय अगाडी साउदी अरब पुगेका ३३ वर्षीय खनालको बाटो काट्ने क्रममा ३ महिना अगाडी साउदीमा ज्यान गएको र धेरै प्रयास पछि मात्रै शव नेपाल ल्याउन सकिएको अर्जुनचौपारी गाउँपालिका वडा नम्बर ५ का सदस्य टेकनाथ खनालले जानकारी दिनुभयो ।
मृत्यु भएको ३ महिना पुगिसक्दा पनि सरकारी पक्षबाट शव ल्याउन कुनै पहल हुन नसक्दा समस्या माथि समस्या थपिएको थियो । ''३ महिना पश्चात् अति नै सङ्घर्ष गरी कुनै प्रकारको क्षति पूर्ति बिना नै शव जन्म घर सम्म आई पुगेको छ ।'' जनप्रतिनिधि सदस्य खनालले भन्नुभयो ।
परिवारका अनुसार मृतक नारायण कार्यरत कम्पनीले क्षतिपूर्ति साथै केही महिना अगाडिदेखिको तलब भत्ता समेत दिएको थिएन । उनी साउदीको असमको(ASAMCO) नाम गरेको कम्पनीमा कार्यरत थिए ।
परिवारको कमजोर आर्थिक अवस्था भएकाले यति बेला नारायणको परिवार बिचल्लीमा परेको वडा सदस्य खनालले बताउनुभयो । यति बेला घरमा नारायणका ७२ वर्षीय बुवा, ६२ वर्षीय आमा, उनकी श्रीमती र २ छोराछोरी छन् ।
Posts
