बसको खोजी गर्न आएको भारतीय टोलीको आइतबार बिदाइ भएको छ । उनीहरूले ल्याएका आधुनिक उपकरणबाट पनि खोजी सफल हुन सकेको थिएन । गत असार २८ गते भरतपुर महानगरपालिका–२९, सिमलतालमा आएको पहिरोमा ६५ जना यात्रुसहित दुई वटा बस त्रिशूली नदीमा बेपत्ता भएका थिए ।
६५ यात्रुमध्ये तीन जना पौडिएर बाँच्न सफल भएका थिए । हालसम्म घटनामा परेका २४ जनाको शव भेटिएको र १८ जनाको सनाखत भएको जिल्ला प्रहरी कार्यालय चितवनका प्रहरी उपरीक्षक श्रीराम भण्डारीले जानकारी दिए । अन्य ३८ यात्रुको अवस्था भने बससँगै अज्ञात छ । काठमाडौँबाट गौर जान नारायणगढतर्फ आउँदै गरेको बागमती प्रदेश ००१ ख २४९५ नम्बरको गणपति डिलक्स बस र वीरगन्जबाट काठामाडौँ जाँदै गरेको बागमती प्रदेशको ०३–००६ ख १५१६ नम्बरको एन्जल्स डिलक्स बस हराइरहेका हुन् ।
यसर्थ यी दुई बस पनि हालसम्म नभेटिएकाको सूचीमै परेका छन् र यसअघि त्रिशूलीमा बेपत्ता भएका र नभेटिएका छ वटा सवारीसाधनको सूचीमा थपिन लागेका छन् ।
२०४९ सालयता त्रिशूलीमा २२ वटा सवारीसाधन हराइरहेका छन् । २०४९ सालमै सिमलतालबाट ४२ यात्रुसहित बेपत्ता भएको यात्रुवाहक बस अझैसम्म फेला पर्न सकेको छैन ।
यस्तै पूर्वगृहमन्त्री माधव घिमिरेसहित तीन जना यात्रु रहेको बा ९ ख १५३१ नम्बरको स्कोरपियो २०७३ असोज ९ गते त्रिशूलीमा खसेर बेपत्ता भएको थियो । सशस्त्र प्रहरी बल आँपटारीका अनुसार आव २०७३/७४ मा पाँच वटा, २०७४/७५ मा चार, २०७५/७६ मा चार, २०७६/७७ मा एक, २०७७/७८ मा एक, २०७९/८० मा एक र २०८०/८१ मा पाँच वटा सवारीसाधन त्रिशूलीमा बेपत्ता भएका छन् । यस आधारमा गत असार २८ गते हराएका बस पनि फेला नपर्ने सम्भावना बढेको छ ।
तथापि स्थानीय प्रशासनले खोजी कार्य जारी राख्ने भएको छ । चितवनका प्रमुख जिल्ला अधिकारी इन्द्रदेव यादवले आइतबार पत्रकार सम्मेलन गर्दै हराइरहेका गाडी फेला पर्न नसकिएको जानकारी दिए । भारतीय टोली फर्किए पनि नेपाली टोलीले भने खोजी कार्य निरन्तर जारी राख्ने उनले बताए ।
नेपाल तथा भारतका खोजकर्ताले चुम्बक र पानीभित्र समेत खोज्न मिल्ने क्यामरालगायतका उपकरण प्रयोग गरेर खोजेका हुन् । भारतको नेसनल डिजास्टर रेस्पोन्स फोर्सका गोताखोर र प्राविधिक गरी १२ जनाको टोली आइतबार बिदा भएको छ । भारतीय टोली साउन ६ गतेदेखि खोजी कार्यमा संलग्न थियो ।
Posts
