कन्चन २ रुपन्देहीमा रहेको गजेडी माध्यमिक विद्यालयले सामाजिक सञ्जालमा विद्यालयको नामलाई लिएर अपव्याख्या भएको सामाग्री प्रति ध्यानाकर्षण भएको जनाएको छ ।
विद्यालयको नामलाई लिएर नकारात्मक टिप्पणी गर्दै भाइरल हुने काम गरेको भन्दै विद्यालयले प्रेस विज्ञप्ति जारी गर्दै आपत्ति जनाएको हो ।
''वास्तविक र ऐतिहासिक तथ्यहरूलाई नबुझी आफ्नो अयोग्यतालाई प्रदर्शन गर्दै यस विद्यालयको नाममा आधारित भई सामाजिक सञ्जालमा विभिन्न व्यक्ति र फेसबुक पेजहरूले भ्रामक, कपोकल्पित तथा अनर्गल प्रचार गरी विद्यालयको ऐतिहासिक छविमा प्रहार अनि बदनाम गर्न खोजिएको विषयप्रति सिङ्गो विद्यालय परिवार घोर भर्त्सना गर्दछ ।'' विद्यालयद्वारा जारी विज्ञप्तिमा भनिएको छ ।
साथै विद्यालयले अब उपरान्त कहीँ कतैबाट कोही कसैले यस प्रकारका आपत्तिजनक क्रियाकलाप गरेमा विद्यालय प्रशासन साइबर कानुन अनुसार कारबाही गर्नका लागि सम्बन्धित निकायमा जना बाध्य हुने विज्ञप्ति मार्फत जनाएको छ ।
विज्ञप्तिमा भनिएको छ :
''नेपाली शब्दकोशका अनुसार 'गज' को अर्थ 'हात्ती' भन्ने हुन्छ । यसरी 'गज' आधार पदमा 'डी' जोडिएर गजेडी शब्दको व्युत्पादन भएको मानिन्छ । स्थानीय थारु भाषामा 'गजेडी' को शाब्दिक अर्थ 'हात्तीको वासस्थान' भन्ने बुझिन्छ । यहाँका शिक्षा प्रेमी र बुद्धिजीवीका अनुसार साबिक गजेडी गाउँबाट गजेडी स्कुलको नामकरण भई सोहीअनुसार गजेडी गाउँ पञ्चायत र बहुदलपछि गजेडी गा. वि. स. रहन गएको हो। यी र यस्ता वास्तविक र ऐतिहासिक तथ्यहरूलाई नबुझी आफ्नो अयोग्यतालाई प्रदर्शन गर्दै यस विद्यालयको नाममा आधारित भई सामाजिक सञ्जालमा विभिन्न व्यक्ति र फेसबुक पेजहरूले भ्रामक, कपोकल्पित तथा अनर्गल प्रचार गरी विद्यालयको ऐतिहासिक छविमा प्रहार अनि बदनाम गर्न खोजिएको विषयप्रति सिङ्गो विद्यालय परिवार घोर भर्त्सना गर्दछ । आज उपरान्त कहीँ कतैबाट कोही कसैले यस प्रकारका आपत्तिजनक क्रियाकलाप गरेमा विद्यालय प्रशासन साइबर कानुन अनुसार कारबाही गर्नका लागि सम्बन्धित निकायमा जाने निर्णय गरेको समेत सम्बन्धित सबैमा जानकारी गराइन्छ ।''
Posts
