अन्दाजी ४३ वर्षीय डिलबहादुर बुढाको हत्या आरोपमा प्रहरीले २६ वर्षीय सन्तोष केसी र २४ वर्षीया मिना बुढाथोकी केसीलाई पक्राउ गरेको हो । सन्तोष र मिना श्रीमान् श्रीमती हुन् ।
जिल्ला प्रहरी कार्यालय रुकुमपश्चिमका सूचना अधिकारी प्रहरी निरीक्षक बखत बहादुर शाहीका अनुसार आइतबार बेलुका बुढाको हत्या भएको थियो । बुवा मोहवीर खत्रीको साथमा आफ्नै घरमा आएका बुढालाई केसी दम्पतीले हत्या गरेको प्रहरीले जनाएको छ ।
प्रहरीका अनुसार बुवाको साथमा आएका बुढाले मादक पदार्थ सेवन गरेका थिए । सन्तोष घरभन्दा केही पर गएको बेला उनकी श्रीमती मिनालाई मृतक बुढाले अश्लील शब्द प्रयोग गर्दै हातपात गरेका थिए ।
सोही क्रममा मिनाले प्रतिकार गर्ने क्रममा नजिकै रहेको दाउराको चिर्पटले हानेको र उक्त बेला सन्तोष समेत आएर सोही चिर्पटले टाउकोमा हानेको खुल्न आएको प्रहरी निरीक्षक शाहीले बताउनुभयो । त्यसपछि बुढाको टाउकोमा चोट लागेको र रक्ताम्मे भएर ढलेको बताइएको छ ।
बुढा मृत अवस्थामा फेला परेको भन्दै प्रहरीलाई सोमबार बिहान जानकारी गराइएको थियो । प्रहरी निरीक्षक शाहीले घटनास्थल पुगेर अनुसन्धान गर्दा हत्या भएको पत्ता लागेको र हत्यामा संलग्न दुवै जनालाई पक्राउ गरेर जिल्ला प्रहरी कार्यालय ल्याइएको बताउनुभयो ।
घटनास्थलबाट मृतकको शव पोष्टमार्टमको लागि जिल्ला अस्पताल सल्लेमा राखिएको छ । प्रहरीले घटनाको थप अनुसन्धान सुरु गरेको पनि जनाएको छ ।
Posts
