.png)
पर्वत , महाशिला गाउँपालिका लाम्तुनस्थित जन विकास मावि, जहाँ उमाकान्त लम्सालले आफ्नो बाल्यकाल बिताउँदै २०५६ सालमा एसएलसी उत्तीर्ण गरेका थिए । अहिले उनी सोही विद्यालयको प्रधानाध्यापक बनेर फर्किएका छन्। शिक्षामा दुई दशकभन्दा लामो अनुभव र विद्यालयप्रतिको गहिरो लगावका साथ लम्सालले २०८१ सालमा विद्यालयको नेतृत्वको जिम्मेवारी सम्हालेका हुन्। यो यात्रा केवल व्यक्तिगत उपलब्धि मात्र नभई शिक्षामा समर्पित व्यक्तित्वको उदाहरणीय प्रतिबिम्ब हो।
२०५७ सालमा महाशिलाको स्वधर्म माविबाट शिक्षण यात्राको थालनी गरेका लम्सालले आफ्नो प्रारम्भिक दिनदेखि नै शिक्षालाई केवल रोजगारीको साधन नभई सेवाको रूपमा लिएका थिए। आफ्नो कर्मठता, निष्ठा, र समर्पणका कारण उनले छोटो समयमा नै शिक्षण क्षेत्रमा छुट्टै पहिचान बनाउन सफल भए। २०६० सालमा जन विकास माविमा अस्थायी शिक्षकको रूपमा नियुक्त भएपछि उनी विद्यालयको शैक्षिक, व्यवस्थापकीय, र समग्र विकासका अभियानमा निरन्तर सहभागी हुँदै आए। वि.स. २०७५ सालमा उनले सोही विद्यालयमा स्थायी नियुक्ति पाएका थिए ।
जन विकास माविसँग लम्सालको सम्बन्ध केवल एक शिक्षकको भूमिकामा मात्र सीमित रहेन। विद्यालयप्रतिको गहिरो भावनात्मक सम्बन्धले उनलाई यहाँको हरेक चुनौतीको सामना गर्न प्रेरित गर्यो। विद्यालयको शैक्षिक गुणस्तरमा सुधार ल्याउन, विद्यार्थीहरूका लागि प्रेरणादायी वातावरण सिर्जना गर्न र व्यवस्थापनलाई नयाँ दिशा दिन उनले विभिन्न पहल गरेका छन्। विद्यार्थीहरूलाई गुणस्तरीय शिक्षाका अवसर प्रदान गर्नका लागि उनले सधैँ नवीनतम पद्धति अपनाउन जोड दिँदै आएका छन्।
२०८१ सालमा विद्यालयको प्रधानाध्यापकको रूपमा नियुक्त भएपछि लम्सालले विद्यालयलाई क्षेत्रीय र राष्ट्रिय स्तरमा एक उदाहरणीय शैक्षिक संस्थान बनाउने लक्ष्य राखेका छन्। उनले भनेका छन्, “मेरो सपना बाल्यकालदेखि नै आफ्नो विद्यालयलाई उत्कृष्ट शिक्षालय बनाउनु थियो। अहिले प्रधानाध्यापकको रूपमा मैले त्यो सपना पूरा गर्ने अवसर पाएको छु।”
"विद्यालयलाई सबै दृष्टिले अब्बल बनाउन म निरन्तर प्रयासरत छु," लम्सालले भने। जन विकास माविको शैक्षिक, भौतिक र व्यवस्थापन पक्षलाई सुदृढ बनाउन उनको नेतृत्वमा विद्यालयले महत्त्वपूर्ण कदम चालेको छ।
लम्सालको यस सफल यात्राले विद्यार्थी, अभिभावक र समग्र शिक्षण क्षेत्रलाई एउटा प्रेरणादायी सन्देश दिएको छ। शिक्षामा समर्पण, लगनशीलता, र दूरदर्शिताको मिश्रणले कस्तो परिवर्तन सम्भव छ भन्ने कुरा उनले प्रमाणित गरेका छन्। विद्यालयलाई सबै दृष्टिकोणबाट अब्बल बनाउन उनले थालेका पहलहरू अहिले सफलतामा रूपान्तरित हुँदै छन्।
प्रधानाध्यापक लम्सालको नेतृत्वले विद्यालयमा अभिभावक र समुदायको विश्वाससमेत मजबुत बनाउने अपेक्षा लिइएको छ। विद्यालयको व्यवस्थापनमा पारदर्शिता, शिक्षकहरूको क्षमता अभिवृद्धि, र विद्यार्थीहरूको हितमा केन्द्रित कार्यक्रमहरूले विद्यालयलाई सामुदायिक केन्द्रको रूपमा पनि विकास अपेक्षा लिइएको छ।
आफ्नै अध्ययन गरेको विद्यालयमा नेतृत्वदायी भूमिका निभाउनु केवल सम्मानको कुरा नभई जिम्मेवारी पनि हो। लम्सालले यस जिम्मेवारीलाई कुशलतापूर्वक निभाउने विश्वास लिइएको छ।
आफ्नै अध्ययन गरेको विद्यालयलाई परिवर्तनको केन्द्र बनाउन सफल लम्सालको यो यात्राले शिक्षाको क्षेत्रमा नयाँ प्रेरणा र ऊर्जा दिएको छ। जन विकास मावि अब स्थानीय स्तरमै मात्र नभई क्षेत्रीय रूपमा पनि उत्कृष्टताको प्रतीक बन्ने विश्वास गरिएको छ।
.jpeg)
Posts
