महाशिवरात्रिको अवसरमा आज पशुपतिनाथ मन्दिर क्षेत्रमा होहल्ला र अवाञ्छित गतिविधिमा संलग्न भएको आरोपमा प्रहरीले ७५ जनालाई नियन्त्रणमा लिएको छ।
जिल्ला प्रहरी परिसर, काठमाडौँका प्रवक्ता एवं प्रहरी उपरीक्षक अपिलराज बोहराका अनुसार निषेधित पदार्थ सेवन गरी होहल्ला गर्ने तथा अनुशासनविपरीत गतिविधि गर्ने व्यक्तिहरूलाई नियन्त्रणमा लिइएको हो। पक्राउ परेका केहीलाई प्रहरी वृत्त गौशाला तथा केहीलाई जिल्ला प्रहरी परिसर, काठमाडौँमा राखिएको छ।
महाशिवरात्रिको सुरक्षा व्यवस्थालाई मध्यनजर गर्दै पशुपतिनाथ मन्दिर क्षेत्रमा प्रहरी उपरीक्षकको नेतृत्वमा ४,२०० सुरक्षाकर्मी परिचालन गरिएको प्रहरीले जनाएको छ।
यसैबीच, पशुपतिनाथ मन्दिरमा बिहानैदेखि हजारौँ भक्तजनको घुइँचो लागेको छ। पशुपति क्षेत्र विकास कोषका प्रवक्ता रेवतीरमण अधिकारीका अनुसार भक्तजनहरूको सहजताका लागि बिहान २ बजेदेखि मन्दिरका चारवटै ढोका खोलिएको छ। दर्शन व्यवस्थापन मिलाइएकाले कम्तीमा १० मिनेटभित्रै भक्तजनहरूले दर्शन गर्न सक्नेछन्।
.jpeg)
Posts
