सुधार केन्द्रमा युवकको हत्या: ‘मुर्गा’ बन्न अस्वीकार गर्दा भयो कुटपिट

फाल्गुन ५, बाराको कलैया उपमहानगरपालिका–१ बैंक रोडस्थित नवजन्म पुनःस्थापना केन्द्रमा भर्ना गरिएका प्रदीपप्रसाद मण्डलको कुटपिटपछि मृत्यु भएको घटनाका दोषीहरूलाई कानुनी दायरामा ल्याउन माग उठेको छ। पीडित परिवारले आइतबार कलैयास्थित बारा उद्योग वाणिज्य संघको सभाहलमा आयोजित पत्रकार सम्मेलनमा दोषीहरूमाथि कडा कानुनी कारबाहीको माग गरेका हुन्।

पत्रकार सम्मेलनमा मृतकका दाजु श्यामप्रसाद धानुकले न्याय सुनिश्चित गर्न दोषीहरूलाई कारबाही गर्नुपर्ने बताए। ‘दोषी उम्कन नपाओस्, निर्दोषलाई अन्याय नहोस्,’ उनले भने। फरार रहेका अभियुक्तहरूलाई राजनीतिक चलखेलमार्फत जोगाउने प्रयास भइरहेको आरोप लगाउँदै उनले शीघ्र गिरफ्तारीको माग गरे।

पुनःस्थापना केन्द्रका सञ्चालक कलैया–३ का साहेबबाबु मन्सुरसहित दुई जना अझै फरार रहेको प्रहरीले जनाएको छ। अनुशासन भंग गरेको भन्दै शारीरिक सजाय अस्वीकार गर्दा परामर्शदातासहितको सामूहिक कुटपिटबाट कलैया उपमहानगरपालिका–९ निवासी ३२ वर्षीय प्रदीप मण्डलको यही फागुन १ गते राति ज्यान गएको थियो। मृतकका परिवारले उनलाई दुई साताअघि पुनःस्थापना केन्द्रमा राखेका थिए।

प्रहरीका अनुसार घटनाका प्रमाणस्वरूप सिसीटिभी फुटेज सुरक्षित राखिएको छ, जसमा मृतकलाई यातना दिइएको दृश्य स्पष्ट देखिन्छ। ओछ्यानको झुलमा लुकेर जोगिन खोज्दा समेत तानेर कुटपिट गरिएको भिडियो फुटेजमा देखिएको छ।

अहिलेसम्म पक्राउ परेका सात जनाविरुद्ध अदालतले कर्तव्य ज्यान अभियोगमा सात दिनको म्याद थप गरी हिरासतमा राखी अनुसन्धान अघि बढाएको बाराका प्रहरी प्रमुख तामाङले जानकारी दिए।

पक्राउ परेकाहरूमा कलैया उपमहानगरपालिका–१ का २४ वर्षीय अरुण सर्राफ, १९ वर्षीय सागर गुप्ता, वडा नं २ का २१ वर्षीय परमेश्वर साह, कलैया–३ का १९ वर्षीय सरफराज मन्सुरी, वडा नं ४ का २२ वर्षीय निरज सर्राफ, वडा नं ६ का २० वर्षीय महम्मद आँसु मियाँ तथा वडा नं ३ का २९ वर्षीय तमन्ना मन्सुरि रहेका छन्।

पुनःस्थापना केन्द्रमा सञ्चालकको तर्फबाट देखरेख गर्ने तथा परामर्शदाताबाहेक मण्डलसहित १४ जना आश्रित रहेका थिए।