पोखरा, १५ नयागाउँस्थित मेरिगोल्ड अङ्ग्रेजी आवासीय मा.वि.मा कक्षा १० का विद्यार्थीहरूको बिदाइ समारोह भव्य रूपमा सम्पन्न भयो। विद्यालयको कक्षा ९ का विद्यार्थीहरूद्वारा आयोजित उक्त कार्यक्रम विद्यालयको सभा हलमा भव्य रूपमा सम्पन्न भएको हो।
कार्यक्रमका प्रमुख अतिथि विद्यालयका संस्थापक निर्देशक मोतीराम गुरुङले विद्यार्थीहरूको उज्ज्वल भविष्यको कामना गर्दै सफलताको शुभेच्छा व्यक्त गर्नुभयो । विशेष अतिथि विद्यालयका म्यानेजिङ डाइरेक्टर डा. जस बहादुर गुरुङले विद्यार्थीहरूलाई आगामी दिनहरूमा परिश्रम, आत्मनिर्भरता, र निरन्तर सिकाइको महत्त्वबारे सुझाव दिनुभयो। त्यस्तै, विद्यालयकी प्राचार्य शर्मिला गुरुङले विद्यार्थीहरूलाई अनुशासन, समय व्यवस्थापन, र लक्ष्य प्राप्तिको उपायहरूबारे मार्गदर्शन गर्दै शुभकामना व्यक्त गर्नुभयो ।
विद्यार्थी बोन्शिखा गुरुङले कार्यक्रमको उद्घाटन स्वागत मन्तव्यका साथ गरिन् भने कक्षा १० का विद्यार्थीहरूले धन्यवाद ज्ञापन प्रस्तुत गरे। कार्यक्रमको आकर्षण स्वरूप कक्षा ९ र १० का विभिन्न विद्यार्थीहरूले साङ्गीतिक प्रस्तुति र नृत्य प्रदर्शन गरेर माहौललाई थप रमाइलो बनाए।
कार्यक्रमको सञ्चालन जिम्मेवारी रिवाज क्षेत्री र रोशनी सुनारले कुशलतापूर्वक निर्वाह गरे। कार्यक्रम संयोजन कक्षा शिक्षक नवीन थापाले गरेका थिए।
विद्यार्थीहरूबिच विभिन्न मनोरञ्जनात्मक प्रतिस्पर्धाहरू पनि सञ्चालन गरियो। कुर्सी दौड प्रतियोगितामा तमन्ना गुरुङ उत्कृष्ट घोषित भए भने बेलुन दौडमा सङ्गम थापा विजयी बने। साथै, विद्यालयले उत्कृष्ट विद्यार्थी छनोट गरी सम्मान प्रदान गर्यो। यस क्रममा प्राचार्य शर्मिला गुरुङले प्रशान गुरुङ र करुणा बालकोटीलाई विशेष पुरस्कार वितरण गर्नुभयो।
कार्यक्रमको अन्तिम चरणमा रेडक्रस सर्कलका अध्यक्ष डेभिड खड्काले समापन मन्तव्य राख्दै उपस्थित सबैलाई धन्यवाद ज्ञापन गर्नुभयो ।