आकर्षक रोजगारीको प्रलोभनमा परेर संयुक्त अरब इमिरेट्स (यूएई) को दुबई पुगेका ४५ भन्दा बढी नेपाली युवा अलपत्र परेका छन्। ललितपुरको कुपण्डोलस्थित एक म्यानपावर कम्पनीमार्फत ४८ दिनअघि दुबई पुगेका उनीहरूले सम्झौताअनुसार न त काम पाए, न तलब, जसका कारण अहिले उनीहरू गम्भीर समस्यामा परेका छन्। उद्धारका लागि विभिन्न निकायसँग हारगुहार गरिरहेका उनीहरूले आफूलाई यथाशीघ्र नेपाल फर्काइदिन आग्रह गरेका छन्।
सम्झौताअनुसारको काम र तलब नपाएपछि पीडितहरू समस्यामा
पीडितमध्येका एक, कृष्ण भण्डारीका अनुसार नेपालमा मेनपावर कम्पनीले ‘प्याकिङ’ को काम भनेर पठाएको थियो। तर, दुबई पुगेपछि उनीहरूलाई ‘क्लिनर’ का रूपमा काममा लगाइयो। सम्झौताअनुसार ८ घण्टा काम गर्ने भनिए पनि उनीहरूलाई १२–१३ घण्टा काममा खटाइएको छ। साथै, ओभरटाइमको भुक्तानीसमेत गरिएको छैन।
पीडितहरूले भनेअनुसार, उनीहरू दुबई र आबुधाबीका विभिन्न स्थानमा कार्यरत छन्। सम्झौतापत्रमा सातामा एक दिन बिदा दिने उल्लेख थियो, तर महिनामा मात्र एक वा दुई दिन मात्रै बिदा पाइन्छ। बिरामी परे पनि ड्युटी गर्नैपर्ने दबाब दिइन्छ, अन्यथा ‘डिपोर्ट पेपर’ मा हस्ताक्षर गर्न बाध्य पारिन्छ।
वैदेशिक रोजगार विभागमा उजुरी नपरेको प्रवक्ताको भनाइ
यस विषयमा वैदेशिक रोजगार विभागका प्रवक्ता गुरुदत्त सुवेदीले विभागमा अहिलेसम्म कुनै औपचारिक उजुरी नपरेको जानकारी दिनुभयो। उहाँका अनुसार यदि समस्यामा परेका श्रमिकका आफन्तहरूले उजुरी दिएमा समाधानका लागि आवश्यक कदम चालिनेछ।
‘फ्री भिसा, फ्री टिकट’ भन्दै २ लाख रुपैयाँ भन्दा बढी असुलियो
पीडितहरूका अनुसार ‘फ्री भिसा’ र ‘फ्री टिकट’ को प्रलोभन देखाइए पनि मेनपावर कम्पनीले प्रतिव्यक्ति २ लाखदेखि २ लाख ४० हजार रुपैयाँसम्म असुलेको थियो। अहिले उनीहरूले नेपाल सरकार, दुबईस्थित नेपाली दूतावास, श्रम मन्त्रालय र वैदेशिक रोजगार विभागलाई सञ्चार माध्यममार्फत आफूहरूको सकुशल उद्धारको लागि पहल गर्न अपील गरेका छन्।
.jpeg)
Posts
