पोखरा, फाल्गुन ३ गते । पोखरा महानगरपालिकामा आज भव्य रूपमा मनाइरहेको पोखरा भ्रमण वर्ष २०२५ को उद्घाटन समारोहमा दुःखद घटना भएको छ। उद्घाटन समारोहको क्रममा नेपाल सरकारका उपप्रधान एवम् अर्थमन्त्री विष्णुप्रसाद पौडेल र पोखरा महानगरपालिकाका प्रमुख धनराज आचार्य घाइते भएका छन्।
उद्घाटन समारोहको तयारी व्यापक थियो। पोखरा महानगरपालिकाले सन् २०२५ लाई पर्यटन प्रवर्द्धनको वर्षका रूपमा घोषणा गर्दै २० लाख पर्यटक भित्र्याउने लक्ष्यसहित कार्यक्रमको आयोजना गरेको थियो। उद्घाटन समारोहलाई अझ प्रभावशाली बनाउन प्रविधिको नयाँ प्रयोग गरिने बताइएको थियो। तर, यही प्रविधि नै प्रमुख दुर्घटनाको कारण बन्न पुग्यो।
आजको कार्यक्रममा अर्थमन्त्री पौडेलले स्विच थिचेर औपचारिक उद्घाटन गरेका थिए। उद्घाटन लगत्तै कार्यक्रम सञ्चालकले प्रविधि प्रयोग गरी नयाँ शैलीमा उद्घाटन गरिएको विवरण दिने क्रममा एकाएक दुर्घटना भएको थियो।
बलेको उद्घाटन दियोको झिल्को आकाशमा उडाउन लागिएको बेलुनमा परेर बेलुन विस्फोट भएको थियो। उक्त विस्फोटको प्रभावले आगोको मुस्लो बनेर अर्थमन्त्री पौडेल र मेयर आचार्यलाई छोएको थियो। पौडेलले बेलुन उडाउनका लागि त्यसको पुच्छर समातिसकेका थिए भने मेयर आचार्यले समात्न खोज्ने क्रममा अचानक ठुलो विस्फोट भएको थियो।
विस्फोटपछि कार्यक्रम स्थलमा हाहाकार मच्चिएको थियो। पौडेल आगोबाट जोगिन स्टेजतर्फ दौडिएका थिए भने आचार्य खुला स्थानतर्फ भागेका थिए। उपस्थित सुरक्षा अधिकारीहरूले तुरुन्तै उनीहरूलाई उद्धार गरी उपचारका लागि पोखराकै अस्पताल लगेका थिए।
दुर्घटनापछि तत्कालै पोखराका अस्पतालहरूमा प्राथमिक उपचार गरिएको थियो। पौडेलको हातमा गहिरो चोट लागेको छ भने मेयर आचार्यको अनुहार, कपाल, र देब्रे गालामा आगोले असर पुर्याएको छ।
स्थानीय चिकित्सकहरूले गम्भीर चोटका कारण थप उपचार आवश्यक देखिएपछि दुवै नेतालाई हेलिकप्टरमार्फत काठमाडौँको कीर्तिपुरस्थित बर्न अस्पताल लगिएको हो।
सुरुमा डिजिटल प्रविधिको माध्यमबाट उद्घाटन गर्ने योजनाअनुसार हाइड्रोजन ग्यास भरिएका बेलुनहरू आकाशमा उडाउन तयारी गरिएको थियो। तर, आयोजकहरूले आगोको स्रोत बेलुनमा असर गर्न सक्ने सम्भावना गम्भीर रूपमा नलिएपछि दुर्घटना भएको प्रत्यक्ष देख्न सकिन्छ।
हाइड्रोजन ग्यास अत्यन्तै ज्वलनशील हुन्छ। यस्तो बेलुनलाई खुला आगोसँगै प्रयोग गर्दा विस्फोटको सम्भावना उच्च हुने भएकाले सावधानी अपनाउनु जरुरी थियो। आयोजकहरूको सुरक्षा व्यवस्थामा कमजोरी देखिएको भन्दै कार्यक्रममा उपस्थित आम दर्शकहरूले आलोचना गरेका छन्।
अस्पताल स्रोतका अनुसार, अर्थमन्त्री पौडेलको हातमा सामान्य जलेको छ भने मेयर आचार्यको अनुहार र देब्रे गालामा चोट लागेको छ। चिकित्सकहरूले दुवै नेतालाई नियमित निगरानीमा राखिएको र अवस्था खतरामुक्त रहेको जानकारी दिएका छन्।
पोखरा भ्रमण वर्ष २०२५ लाई सफल बनाउन आयोजित यो कार्यक्रम दुःखद दुर्घटनाका कारण प्रभावित भएको छ।
.jpeg)
Posts
