प्रहरी अनुसन्धानअनुसार, इशालप्रसाद कुर्मी आफ्ना छिमेकी साथीहरूसँग तास खेल्न गएका बेला पैसाको विषयमा विवाद भएको थियो। सोही विवादका कारण मुकेशप्रसाद यादव, अरुणकुमार यादव र मुना तिवारीले मिलेर कुर्मीको हत्या गरी शव भेडाहा खोलामा फालेको खुलेको छ।
जिल्ला प्रहरी कार्यालय पर्साका प्रमुख प्रहरी उपरीक्षक गौतम मिश्रका अनुसार, फागुन ७ गते वीरगन्ज–२७, उदयपुर घुर्मी निवासी जोगिन्द्रप्रसाद कुर्मीका १९ वर्षीय छोरा इशालप्रसाद कुर्मी कामका लागि घरबाट निस्किएका थिए। तर, अबेर रातिसम्म नफर्किएपछि परिवारले फागुन ८ गते प्रहरीमा उजुरी दिएका थिए।
प्रहरीले खोजतलासका क्रममा फागुन ११ गते भेडाहा खोलामा कुर्मीको शव फेला पारेको थियो। अनुसन्धानबाट फागुन ७ गते नै तास खेल्दाको ३५ सय रुपैयाँ सम्बन्धी विवादकै कारण हत्या भएको खुल्न आएको छ।
पक्राउ परेका तीन जनालाई ज्यानसम्बन्धी कसुरमा ६ दिनको म्याद थप गरी अनुसन्धान जारी रहेको प्रहरीले जनाएको छ। साथै, घटनासम्बन्धी थप विवरण अनुसन्धानपछि सार्वजनिक गर्ने बताइएको छ।
.jpeg)
Posts
