फाल्गुन ८, धादिङबाट विवाहको जन्ती पुर्याएर फर्किंदै गरेको ना ४ ख ८८१७ नम्बरको बस मंगलबार बिहान काभ्रेपलाञ्चोकको तेमाल गाउँपालिका-३, कुन्डोलमा दुर्घटनाग्रस्त भएको छ। प्रहरीका अनुसार बस ट्रनिङमा ब्याक गर्ने क्रममा अनियन्त्रित भई सडकबाट करिब २०० मिटर तल खसेको थियो।
दुर्घटनाका कारण ५० वर्षीय रामसिंह तामाङको घटनास्थलमै मृत्यु भएको छ। उनी तेमाल-१ का स्थायी बासिन्दा थिए। बसका चालक ५० वर्षीय कृष्ण ब्लोन गम्भीर घाइते भएका छन्। उनी मकवानपुर, बागमती गाउँपालिकाका बासिन्दा हुन्। गम्भीर घाइते ब्लोनलाई तत्काल उपचारका लागि धुलिखेल अस्पताल लगिएको छ।
प्रहरीले दुर्घटनाको अनुसन्धान गरिरहेको जनाएको छ।