काठमाडौं प्रहरी परिसरका एक प्रहरी अधिकृतका अनुसार बुधबार राती भएको सो सामान्य झगडामा ललितपुरको कार्यविनायक घर भएका २८ वर्षीय सुसन शाक्यको मृत्यु भएको हो । प्रहरीका अनुसार रातीको समयमा सोही क्षेत्रमा टहलिँदै रहेका दुई बालकलाई शुरुमा शाक्यले झापड हानेका थिए ।
त्यही रिसमा ती बालकहरुले शाक्यलाई बासको भाटाले हान्दा शाक्यको अचानक मृत्यु हुन पुगेको थियो । भाटा हान्ने नाबालकलाई प्रहरीले पक्राउ गरेको छ ।
नाबालक भएकाले उनीहरुको नाम गोप्य राखिएको प्रहरीले जनाएको छ । पक्राउ परेका बालकहरुले प्रहरीसँग शाक्यले आफूहरुलाई गालामा थपड हानेपछि त्यही रिसमा उनको टाउकोमा भाटाले हानेको स्वीकार गरेका बताइएको छ ।
प्रहरीका अनुसार घटना भवितव्य रुपमा घटेको र ती बालकहरुको शाक्यलाई मार्ने योजना भने नरहेको पाइएको छ । ती बालकहरुले सामान्य रुपमा हानेको तर भवितव्य भई अचानक मृत्यु भएको हुन सक्ने प्रहरीले जनाएको छ ।
हत्यामा संलग्न दुई बालकविरुद्ध काठमाडौं जिल्ला अदालतबाट ४ दिनको म्याद लिएर अनुसन्धान अघि बढाइएको छ । सीसीटीभी फुटेजको आधारमा पहिचान गरी प्रहरीले उनीहरुलाई पक्राउ गरेको थियो ।
पक्राउ परेका दुवै जनाले हत्या स्वीकार गरेको परिसरका एक अधिकृतले बताए ।
.jpeg)
Posts
