भारतको उत्तराखण्डस्थित चमोली जिल्लाको मानामा हिमपहिरोका कारण सडक निर्माणमा संलग्न ५७ जना कामदार फसेका छन्। भारतीय सञ्चारमाध्यमहरूका अनुसार हालसम्म १६ जनाको उद्धार गरिएको छ र उनीहरूलाई उपचारका लागि अस्पताल लगिएको छ। अझै ४१ जना बेपत्ता रहेका छन्।
शुक्रबार दिउँसो बद्रीनाथ धाम नजिक मानामा हिमनदी फुट्दा यो दुर्घटना भएको हो। सो समयमा सेनाको आवतजावत सहज बनाउन सडकबाट हिउँ हटाउने कार्यमा ५७ जना कामदार संलग्न थिए।
हाल उद्धार टोलीहरू घटनास्थलमा परिचालित छन्। तर, निरन्तर पानी र हिउँ परिरहेकाले उद्धारमा कठिनाइ भइरहेको छ। साथै, खराब मौसमका कारण हेलिकप्टरको प्रयोग गर्न नसकिएको बताइएको छ।
भारतीय गृहमन्त्री अमित शाहले सामाजिक सञ्जाल 'एक्स' मा घटनाबारे जानकारी दिँदै लेखेका छन्, "उत्तराखण्डको चमोलीमा हिमनदी फुटेको घटनाबारे मुख्यमन्त्री पुस्कर धामीसहित आइटीबीपी र एनडीआरएफका अधिकारीहरूसँग छलफल गरेको छु। हाम्रो प्राथमिकता फसेका मानिसहरूको सुरक्षित उद्धार गर्नु हो। स्थानीय प्रशासन उद्धार कार्यमा पूर्ण रूपमा सक्रिय छ। साथै, दुई एनडीआरएफ टोलीहरू पनि चाँडै घटनास्थलमा पुग्दैछन्।"
.jpeg)
Posts
