फागुन ५ गते, रूपन्देही । भारतको प्रयागराजमा जारी महाकुम्भ मेलामा सहभागी भएर फर्किरहेका नेपाली श्रद्धालु सवार कार दुर्घटनाग्रस्त हुँदा तीन जनाको ज्यान गएको छ । दुर्घटना भारतको आजमगढ नजिकै बनारस-आजमगढ राजमार्गमा भएको हो ।
जिल्ला प्रहरी कार्यालय रूपन्देहीका प्रहरी उपरीक्षक रञ्जितसिंह राठौरका अनुसार मृत्यु हुनेमा देवदह नगरपालिका-९, भलुहीका ४५ वर्षीय गणेश खनाल, उनकी श्रीमती ४० वर्षीया दीपा खनाल र सोही ठाउँकी ४५ वर्षीया गीता शर्मा रहेका छन् । उनीहरू सवार कार सडक छेउको डिभाइडरमा ठोक्किएर दुर्घटनाग्रस्त भएको थियो ।
घटनामा अन्य पाँच जना घाइते भएका छन् । घाइतेहरूको भारतकै आजमगढ र गोरखपुरस्थित अस्पतालमा उपचार भइरहेको प्रहरी उपरीक्षक राठौरले जानकारी दिएका छन् ।
रूपन्देहीको देवदह नगरपालिका-९ का ३५ जना महाकुम्भ स्नानका लागि गएका थिए । उनीहरू पाँच कारमा यात्रा गरिरहेका थिए । सोही टोली फर्किने क्रममा दुर्घटनामा परेको हो । मृतकका शव परीक्षणका लागि स्थानीय अस्पतालमा राखिएको छ भने घटनाबारे भारतीय प्रहरीसँग नियमित समन्वय भइरहेको बताइएको छ ।
Posts
