पोखराको पृथ्वीनारायण क्याम्पस (पीएन क्याम्पस) को स्वतन्त्र विद्यार्थी युनियन (स्ववियु) अध्यक्षमा नेकपा एमाले निकट अनेरास्ववियुका विष्णु पोखरेल निर्वाचित भएका छन्।
उनले नेपाल विद्यार्थी संघ (नेविसंघ) का सुशील न्यौपानेलाई दोब्बर मत अन्तरले पराजित गर्दै १,१०५ मत प्राप्त गरे। उनका निकटतम प्रतिस्पर्धी सुशील न्यौपानेले ५०३ मत पाए भने स्वतन्त्र उम्मेदवार विप्लवी न्यौपानेले ४६९ मत, अखिल क्रान्तिकारीका नवीन अधिकारीले २२३ मत, संयुक्त प्यानलका सन्तोष पौडेलले १९६ मत र अखिल छैठौंका मिलन सुनारले २८ मत प्राप्त गरेको निर्वाचन अधिकृत डा. रामचन्द्र पोखरेलले जानकारी दिए।
सचिव पदमा अनेरास्ववियुका विराट दुवाडी १,४१३ मत प्राप्त गर्दै विजयी भए। नेविसंघका विवेक भट्टराईले ६२८ मत र अखिल क्रान्तिकारीका मिराज थापा मगरले २९३ मत पाए। कोषाध्यक्ष पदमा अनेरास्ववियुकी सन्दिका गुरुङले १,३०४ मत प्राप्त गर्दै जित हासिल गरिन् भने नेविसंघकी अमिषा यादवले ६४७ मत पाइन्।
पृथ्वीनारायण क्याम्पसमा अनेरास्ववियुले लगातार जित्दै आएको छ। यसपटक पनि उसले आफ्नो विजय यात्रा कायम राख्न सफल भएको छ। क्याम्पसमा ९,२७० जना मतदाता भए पनि २,८९७ जनामात्रै मतदानमा सहभागी भएका थिए। कम मतदानको कारण विद्यार्थीहरूले मतदाता परिचयपत्र नलगेका कारण भएको बताइएको छ।
.jpeg)
Posts
