सोमबार राति क्याम्पस प्रशासनद्वारा जारी गरिएको विशेष सूचनामा भनिएको छ, "निर्वाचन प्रक्रिया शान्तिपूर्ण रूपमा सम्पन्न गर्न असहज परिस्थितिको सिर्जना भएकाले सम्पूर्ण निर्वाचन प्रक्रिया स्थगित गरिएको छ।"
यसअघि मतदान सुरु हुनु केही घण्टाअघि नै पहिलो सूचना आउँदा, मतपत्रमा एक उम्मेदवारको पछाडि रेजा लगाउने बक्स छुटेको भन्दै मतदान स्थगित गरिएको थियो। निर्वाचन समितिको आत्मस्वीकृति र निर्णयले अलि पारदर्शिता देखाए पनि त्यसपछि आएका निर्णयहरू भने बढी असमञ्जसपूर्ण बन्दै गएका छन्।
शैक्षिक संस्थाहरूमा हुने निर्वाचन लोकतान्त्रिक अभ्यासको पाठशाला मानिन्छ। तर पृथ्वीनारायण क्याम्पसमा देखा परेका पछिल्ला घटनाक्रमले त्यो पाठशालालाई अव्यवस्थाको प्रतीक बनाइदिएको छ। सूचनामा उल्लेख गरिएको “अत्यधिक भीड, गालीगलौज, अशोभनीय नारावाजी” र "शान्तिपूर्ण वातावरण कायम गर्न कठिनाइ" को उल्लेखले विद्यार्थी संगठनहरूबीचको द्वन्द्व सतहमा आइपुगेको देखिन्छ।
मतदानको पूर्वसन्ध्यामा यस्तो ‘नियन्त्रणबाहिरको अवस्था’ सिर्जना हुनु भनेको व्यवस्थापन तहमा गम्भीर कमजोरी हुनु हो। निर्वाचन सम्पन्न गर्ने सम्पूर्ण प्रक्रिया निर्वाचन समिति, क्याम्पस प्रशासन, र सुरक्षा संयन्त्रको सहकार्यमा अघि बढ्ने हो भने यसरी पटक–पटक स्थगन हुनु न्यायसंगत देखिँदैन।
विद्यार्थी संगठनहरू आफैँले समेत निर्वाचनलाई अपारदर्शी बनाउने रणनीतिमा लिप्त देखिएका छन्। मतपत्र त्रुटि प्रकरणलाई लिएर सत्तापक्ष र विपक्षबीच आरोप–प्रत्यारोप चलेको छ। यस्तो अवस्थामा निर्वाचनको निष्पक्षता र विधिसम्मतता माथि समेत गम्भीर प्रश्न उठेको छ।
स्ववियु निर्वाचन स्थगनपछि विरोधमा उत्रन सक्ने विद्यार्थी संगठनहरू सशक्त आन्दोलनको तयारीमा रहेको बुझिएको छ। प्रजातान्त्रिक अभ्यासका नाममा हुने यस्ता क्रियाकलापले विद्यार्थीलाई राजनीतिमुखी बनाउने भए तापनि, अध्ययन केन्द्रित शैक्षिक वातावरणमा खलल पुर्याउँछ। यसले क्याम्पसको समग्र छवि नै धूमिल बनाउन सक्छ।
निर्वाचन स्थगित भएको भए पनि समाधान खोज्ने बाटो बन्द भएको छैन। क्याम्पस प्रशासनले स्पष्ट मिति तोकेर, सबै पक्षको सहमति लिएर, विधिसम्मत र पारदर्शी प्रक्रियाबाट निर्वाचन अगाडि बढाउन आवश्यक छ। निर्वाचन समितिले पछिल्ला त्रुटिबाट पाठ सिक्दै निष्पक्ष र व्यवस्थित मतदान सुनिश्चित गर्नुपर्ने आवश्यकता झनै बढेको छ।
.jpeg)
Posts
