फाल्गुन २२, जनकपुरबाट काठमाडौंका लागि उडेको बुद्ध एयरको जहाजको अगाडिको पांग्रा उड्ने क्रममा जनकपुरमै खसेको छ। तर, विमान त्रिभुवन अन्तर्राष्ट्रिय विमानस्थलमा सुरक्षित रूपमा अवतरण गर्न सफल भएको छ।
जनकपुर विमानस्थलबाट अपराह्न ४:३९ बजे उडेको एटीआर ७२ जहाज काठमाडौं विमानस्थलमा साँझ ५:०६ बजे सुरक्षित रूपमा अवतरण भएको हो। अवतरणपछि निरीक्षण गर्दा जहाजको अगाडिको दुई नोज ह्वीलमध्ये एउटा हराइरहेको पाइएको हो।
उडान अवधिभर चालक दललाई यो समस्या बारे कुनै जानकारी नभए पनि जहाज सुरक्षित रूपमा अवतरण भएको थियो। तर, पांग्रा हराएको पुष्टि भएपछि त्रिभुवन अन्तर्राष्ट्रिय विमानस्थलमा हलचल मच्चिएको थियो। नागरिक उड्डयन प्राधिकरणका अनुसार, पछि जनकपुर विमानस्थलमा जाँच गर्दा हराएको पांग्रा धावनमार्गमै फेला परेको छ।
त्रिभुवन अन्तर्राष्ट्रिय विमानस्थलका प्रवक्ता रिन्जी शेर्पाले जहाजको अवस्थाबारे कुनै आधिकारिक जानकारी नभएको बताएका छन्। यस्तै, नागरिक उड्डयन प्राधिकरणका सूचना अधिकारी ज्ञानेन्द्र भूलले अवतरणपछि मात्र पांग्रा हराएको थाहा भएको बताए।
"ककपिटमा ल्यान्डिङ गेयर सम्बन्धी कुनै नोटिफिकेशन वा इन्डिकेटर नआएकाले चालक दललाई समस्या थाहा भएन। तर, एउटा मात्रै पांग्राले भए पनि जहाज सुरक्षित रूपमा अवतरण गरियो," भूलले जानकारी दिए।
हाल उक्त जहाजलाई ग्राउन्डेड गरी प्राविधिक परीक्षण भइरहेको छ। सो उडानमा ६२ जना यात्रु सवार थिए, जसले कुनै अप्रिय घटना बेहोर्नु परेन।
.jpeg)
Posts
