फाल्गुन १७, सिन्धुपाल्चोकमा ६.१ म्याग्निच्युडको भूकम्पपछि परकम्पको श्रृंखला जारी रहेको छ। राष्ट्रिय भूकम्प मापन तथा अनुसन्धान केन्द्रका अनुसार शुक्रबार (फागुन १६) बेलुका ८ बजेसम्म ३८ वटा परकम्पहरू मापन गरिएका छन्।
शुक्रबार बिहान २:५१ बजे सिन्धुपाल्चोकको भैरवकुण्ड क्षेत्रलाई केन्द्रविन्दु बनाएर ६.१ म्याग्निच्युडको भूकम्प गएको थियो। केन्द्रले उक्त भूकम्पलाई २०७२ सालको विनाशकारी गोरखा भूकम्पको परकम्प भएको बताएको छ।
त्यसपछि निरन्तर रूपमा २.३ देखि ३.८ म्याग्निच्युडका परकम्पहरू मापन भएका छन्। ती सबै परकम्पहरू सिन्धुपाल्चोक क्षेत्रमै केन्द्रित रहेको केन्द्रले जानकारी दिएको छ।
शुक्रबार बेलुका ८ बजेयता भने उल्लेखनीय परकम्पहरू मापन नभएको केन्द्रले जनाएको छ। सिन्धुपाल्चोकमा महसुस गरिएको मुख्य भूकम्पको धक्का काठमाडौं उपत्यका, अन्य विभिन्न जिल्ला तथा भारतका केही भूभागसम्म पुगेको थियो।
.jpeg)
Posts
