पर्वत प्रहरी प्रमुख डिएसपी रविन विष्टका अनुसार गम्भीरलाई फागुन २५ गते रुपन्देहीको मायादेवी गाउँपालिका–८ बसडिलवाबाट र तेजबहादुरलाई ललितपुरको महालक्ष्मी नगरपालिका–८ लुभुबाट पक्राउ गरिएको हो।
गम्भीर लामो समयदेखि रुपन्देहीमा लुकिएर बसेका थिए भने तेजबहादुर भने ललितपुर र पर्वत दुबै स्थानमा बसोबास गर्दै आएका थिए। दुवै जना पर्वत साबिक कुर्घा गाविस–९ (हाल महासिला गाउँपालिका–५) का बासिन्दा हुन्।
उनीहरूलाई २०४४ साल फागुन ७ गते राति साढे १० बजे रामबहादुर गुरुङको हत्या गरेको अभियोग छ। रामबहादुरलाई चक्कु र लाठीले प्रहार गरी खोल्सामा फालेर हत्या गरिएको अनुसन्धानबाट खुलेको छ। घटनापछि उनीहरू फरार रहेका थिए।
२०७८ साल असार १३ गते पर्वत जिल्ला अदालतले दुबै जनालाई जनही १० वर्षको कैद सजाय सुनाएको थियो। अदालतको फैसलापछि उनीहरू पक्राउ पर्न सकेका थिएनन्।
पक्राउ परेपछि दुबैलाई अदालतमा पेश गरिएको र अदालतको आदेशअनुसार कारागार चलान गरिएको डिएसपी विष्टले जानकारी दिए।
हत्या घटनामा संलग्न अन्य दुई अभियुक्त अझै फरार छन्। उनीहरूको खोजी भइरहेको प्रहरीको भनाइ छ। “लामो समयदेखि फरार रहेका उनीहरूलाई विशेष सुराकी र निगरानीको आधारमा पक्राउ गरिएको हो,” डिएसपी विष्टले भने, “फरार अन्य दुई अभियुक्त पनि चाँडै पक्राउ पर्ने आशा छ।”
.jpeg)
Posts
