स्याङ्जा, चैत १० – पाल्पा रामपुर नगरपालिका–१० कुमालटोलका ५८ वर्षीय मेघनाथ कुमाल कालीगण्डकी नदीमा हाम फालेर बेपत्ता भएका छन्। घटनापछि इलाका प्रहरी कार्यालय चापाकोटबाट खटिएको टोलीले खोजी कार्य तीव्र पारेको जिल्ला प्रहरी कार्यालय स्याङ्जाले जनाएको छ।
प्रहरीका अनुसार कुमाल मङ्गलबार दिउँसो करिब २ बजेतिर स्याङ्जाको चापाकोट नगरपालिका–१, तेउनास भन्ने स्थानतर्फ हिँडेका थिए। उनी विदेशमा कार्यरत आफ्नी छोरीलाई सामान पठाउन घरबाट निस्किएको बताइएको छ। तर, सो स्थानमा नपुगी उनी बीचैमा कालीगण्डकी नदीमा हाम फालेको प्रारम्भिक जानकारी प्रहरीले दिएको छ।
हालसम्म उनको अवस्था पत्ता लाग्न सकेको छैन। बेपत्ता कुमालको खोजीका लागि प्रहरी टोलीले नदी आसपासको क्षेत्र खनखन्दै खोजतलास जारी राखेको छ।
यस घटनाबारे थप अनुसन्धान भइरहेकाे जनाउँदै जिल्ला प्रहरी कार्यालय स्याङ्जाका सूचना अधिकारी प्रहरी निरीक्षक प्रवेश तिवारीले नागरिकमा संयमता र धैर्यता अपनाउन आग्रह गरेका छन्। साथै, यस विषयमा जानकारी भएमा तत्काल नजिकको प्रहरी कार्यालयलाई सम्पर्क गर्न समेत अनुरोध गरिएको छ।
.jpeg)
Posts
