क्रिप्टोकरेन्सीको कारोबारमा संलग्न व्यक्तिमाथि लुटपाट: प्रहरी हवलदारसहित ६ जना पक्राउ

फागुन २१ – क्रिप्टोकरेन्सीको अवैध कारोबारमा संलग्न एक व्यक्तिलाई प्रहरीले पक्राउ गरेको छ। साथै, सोही व्यक्तिलाई लुटपाट गर्ने आरोपमा सुरक्षाकर्मी समेत रहेका ६ जनालाई पनि नियन्त्रणमा लिइएको छ।

प्रहरी स्रोतका अनुसार, काठमाडौं महानगरपालिका वडा नं. ३, तिलिङ्गेटारमा अवैध क्रिप्टोकरेन्सी कारोबार भइरहेको भन्ने सूचनाको आधारमा जिल्ला प्रहरी परिसर काठमाडौंबाट खटिएको टोलीले रोशन गुरुङलाई पक्राउ गरेको हो। गुरुङ धादिङको खनियावास गाउँपालिका वडा नं. ४ स्थायी बासिन्दा हुन्, हाल टोखा नगरपालिका वडा नं. ८, ग्रिनल्याण्ड मिलनटोलमा बस्दै आएका थिए।

गुरुङलाई पक्राउ गरी सोधपुछ गर्दा, उनलाई प्रहरीको परिचयपत्र देखाउँदै हतकडी लगाएर नियन्त्रणमा लिई १४ लाख रुपैयाँ लुटिएको खुलासा भएको छ। अनुसन्धानका क्रममा, उक्त लुटपाटमा सशस्त्र प्रहरी बल नेपालका एक सहायक हवल्दार र नेपाल प्रहरीका दुई कर्मचारी समेत गरी ६ जना संलग्न रहेको खुलेको छ। पक्राउ परेका ६ जनालाई जिल्ला अदालतबाट पाँच दिनको म्याद थप अनुमति लिएर अनुसन्धान अघि बढाइएको छ।

अनुसन्धानको क्रममा, रोशन गुरुङले रु. १ अर्ब ८७ करोड ७ लाख १३ हजार १ सय ६२ बराबरको क्रिप्टोकरेन्सी कारोबार गरेको प्रमाण फेला परेको छ। उनलाई अभौतिक मुद्रा सम्बन्धी कसुर अन्तर्गत मुद्दा दर्ता गरी अदालतबाट पाँच दिनको म्याद थप अनुमतिसहित अनुसन्धान जारी राखिएको छ।

पक्राउ परेका व्यक्तिहरू

प्रहरीले पक्राउ गरेका व्यक्तिहरूमा नेपाल प्रहरी र सशस्त्र प्रहरीका सदस्यहरू समेत रहेका छन्। पक्राउ परेका व्यक्तिहरू निम्नानुसार छन्:

१. राजेन्द्र बहादुर के.सी (३६ वर्ष) – सशस्त्र प्रहरी सहायक हवल्दार, जिल्ला प्युठान, गौमुखी गा.पा। २. खगेन्द्र मल्ल ठकुरी (३५ वर्ष) – प्रहरी सहायक हवल्दार, जिल्ला बाँके, बैजनाथ गा.पा। ३. हिरा मंग्राती (२४ वर्ष) – प्रहरी जवान, जिल्ला खोटाङ, रावावेसी गा.पा। ४. कपिल बस्नेत (२४ वर्ष) – जिल्ला मोरङ, सुन्दरहरैचा नगरपालिका। ५. संजोक तामाङ (३१ वर्ष) – जिल्ला दोलखा, रातमाटे गा.पा। ६. मनिस कुमार राय (२० वर्ष) – जिल्ला मोरङ, बेलवारी। ७. रोशन गुरुङ (२६ वर्ष) – क्रिप्टोकरेन्सी कारोबारमा संलग्न, जिल्ला धादिङ, खनियावास गा.पा।