अमेरिका पठाइदिने प्रलोभन देखाएर संगठित गिरोहले रुकुम पश्चिमका १० जनाबाट झन्डै सवा करोड रुपैयाँ ठगी गरेको खुलासा भएको छ। उक्त गिरोहले नेपालस्थित अमेरिकी दूतावास र उच्च पदस्थ व्यक्तिहरूसँग निकट सम्बन्ध रहेको भ्रम दिँदै सजिलै विदेश पठाइदिने भन्दै पीडितहरूबाट रकम असुलेको हो।
प्रहरी अनुसन्धान अनुसार, सोही गिरोहले न्युजिल्यान्ड पठाउने आश्वासन दिँदै रुकुम पश्चिमकै थप ७ जनाबाट १० लाख रुपैयाँ ठगी गरेको समेत फेला परेको छ। ठगीको शिकार बनेका पीडितहरूले विदेश जान नसकेपछि जिल्ला प्रहरी परिसर, ललितपुरमा जाहेरी दिएका थिए।
जिल्ला प्रहरी प्रमुख एसएसपी श्यामकृष्ण अधिकारीका अनुसार ठगी, किर्ते र संगठित अपराधको आरोपमा सात जनाविरुद्ध अनुसन्धान थालिएको छ। अनुसन्धानका लागि जिल्ला अदालत, ललितपुरबाट अनुमति लिएर गिरोहका चार जनालाई पक्राउ गरिएको छ भने तीन जना अझै फरार छन्।
पक्राउ पर्नेहरूमा गिरोहका मुख्य योजनाकार मनोज सिंह भनिने ललितपुर इमाडोलका अनुप सिंह, उनका सवारी चालक सचिन व्यञ्जनकार, काभ्रे घर भई हाल दिव्यज्योति कन्सल्टेन्सी (कलंकी) का प्रबन्ध निर्देशक राजकुमार केसी, र आफूलाई अनुप सिंहको कानुनी प्रतिनिधि भन्दै परिचय दिने दीपकराज खनाल रहेका छन्।
फरार रहेका तीन जनामा किरणसिंह कार्की, रामचन्द्र खनाल र अभिषेकराज खनाल रहेका छन्।
प्रहरीले घटनासँग सम्बन्धित एक नक्कली अमेरिकी भिसा पनि बरामद गरेको छ। उक्त भिसा १२ वर्षीया एक बालिकाका नाममा अमेरिकी दूतावासबाट जारी गरिएको देखाइएको थियो। ती बालिका रुकुम पश्चिमकी सुभद्रा दाहालकी जेठी छोरी हुन्। सुभद्राले गत असोज २ मा पतिको साथ छोडेकी थिइन् र अहिले इमाडोलमा दुई छोरी र एक छोरासहित कोठा भाडामा बस्दै आएकी छन्।
जाहेरी अनुसार, सुभद्राले अमेरिका जान चार जनाको लागि चेक र नगद गरी ९३ लाख रुपैयाँ बुझाएकी थिइन्। अन्य पीडितहरूले पनि अमेरिका जान २४ लाख ८० हजार र न्युजिल्यान्ड जान १० लाख रुपैयाँ सो गिरोहलाई बुझाएको उल्लेख छ।
प्रहरीले घटनाको थप अनुसन्धान जारी राखेको जनाएको छ।
.jpeg)
Posts
