काठमाडौं, २०८१ चैत १५ – पूर्व राजा ज्ञानेन्द्र शाहका समर्थकहरूले काठमाडौंको तीनकुने क्षेत्रमा आयोजना गरेको शान्तिपूर्ण प्रदर्शन हिंसात्मक रूप लिँदा व्यापक क्षति भएको छ। प्रदर्शनका क्रममा निजी सम्पत्ति, अस्पताल, सञ्चार गृह, राजनीतिक दलका कार्यालय, व्यापारिक केन्द्र तथा यातायातका साधनमाथि तोडफोड, आगजनी र अन्य आपराधिक क्रियाकलाप भएका छन्। यस घटनामा दुई जनाको मृत्यु भएको छ भने दर्जनौँ घाइते भएका छन्।
प्रदर्शनको क्रममा ठूलो मानवीय क्षति
शान्तिपूर्ण प्रदर्शनको रूपमा सुरु भएको यो आन्दोलन हिंसात्मक बन्दा ५३ जना नेपाल प्रहरी, २२ जना सशस्त्र प्रहरी तथा ३५ जना प्रदर्शनकारी घाइते भएका छन्। थप रूपमा, दुईजनाको ज्यान गएको छ। मृतकहरूमध्ये २९ वर्षीय सबिन महर्जन कोटेश्वर क्षेत्रमा घाइते भई उपचारको क्रममा शिक्षण अस्पताल, महाराजगञ्जमा मृत्यु भएको थियो। अर्का मृतक सुरेश रजक तीनकुनेस्थित मार्बल हाउसमा मृत अवस्थामा फेला परेका थिए।
भौतिक सम्पत्तिमा व्यापक क्षति
प्रदर्शनका क्रममा सरकारी तथा निजी सवारी साधनमा आगजनी र तोडफोड गरिएको छ। ९ वटा सरकारी, ६ वटा निजी तथा १५ वटा अनिश्चित सवारी साधनमा क्षति पुगेको छ। यस्तै, १४ स्थानमा आगजनी तथा ९ स्थानमा तोडफोड भएको छ।
मुख्य तोडफोड र आगजनी भएका स्थानहरू
तोडफोड तथा आगजनी भएका स्थानहरूमध्ये मुख्य रूपमा तीनकुनेको अन्नपूर्ण कम्प्लेक्स, कोटेश्वर महादेवस्थान, कोटेश्वर गणेश चोक, बालकुमारी क्षेत्र, समाजवादी पार्टी कार्यालय, वानेश्वर पुल क्षेत्र, एयरपोर्ट फोहोर क्षेत्र, सिनामंगलस्थित विभिन्न भवनहरू तथा व्यवसायिक प्रतिष्ठानहरू रहेका छन्। यस्तै, अन्नपूर्ण मिडिया हाउस, कान्तिपुर मिडिया हाउस, केएमसी अस्पताल, नेपाल प्रहरीका सिसिटिभी क्यामेरा, ट्राफिक प्रहरी प्रभाग कोटेश्वर लगायतका स्थानमा तोडफोड भएको छ।
५१ जना नियन्त्रणमा, अनुसन्धान जारी
यस घटनामा संलग्न रहेको आशंकामा प्रहरीले ५१ जनालाई नियन्त्रणमा लिएको छ। जिल्ला प्रहरी परिसर, काठमाडौंका अनुसार घटनाको अनुसन्धान जारी छ र संलग्नहरूमाथि कानुनी कारबाही अघि बढाइनेछ। प्रहरी प्रशासनले यस्तो किसिमका हिंसात्मक गतिविधि अराजकता सिर्जना गर्ने भन्दै कडा कारबाही गरिने जनाएको छ।
यस प्रदर्शनले काठमाडौं उपत्यकाको शान्ति सुरक्षामा गम्भीर असर पारेको छ भने सर्वसाधारण नागरिक त्रासमा परेका छन्।
.jpeg)
Posts
