जयेन्दु बाल सुधारगृहमा तनाव: प्रहरीद्वारा नियन्त्रण, ५० भन्दा बढी बालबन्दी पक्राउ - Brighter Network

बाँके, चैत २ – बाँकेको डुडुवामा अवस्थित जयेन्दु बाल सुधारगृहमा शुक्रबार राति भएको झडपपछि प्रहरीले सुधारगृहलाई नियन्त्रणमा लिएको छ। बालबन्दीबीचको आन्तरिक झडप चर्किएर हिंसात्मक बन्दै गएपछि प्रहरी र सशस्त्र प्रहरीको संयुक्त टोलीले बल प्रयोग गर्दै सुधारगृहमा प्रवेश गरेको हो।

झडपमा परी ६ जना बालबन्दी घाइते भएका छन् भने ५० भन्दा बढी बालबन्दीलाई नियन्त्रणमा लिएको बाँकेका प्रहरी प्रवक्ता डिएसपी दीपक पातलीले जानकारी दिनुभयो।

बालबन्दीले प्रहरीमाथि छतबाट ढुंगा प्रहार गरेका थिए, जसका कारण केही सुरक्षाकर्मी पनि घाइते भएका छन्। यस्तै, बालबन्दीले सुधारगृहको दोस्रो तलामा आगजनी गरी केही संरचनात्मक क्षति पु-याएको जनाइएको छ।

दमकललाई प्रवेशमा अवरोध, बारम्बारको वार्ता प्रयास असफल भएपछि, प्रहरीले राति बल प्रयोग गरेर सुधारगृहमा प्रवेश गरेको थियो। प्रहरीको टोली एसपी तुलबहादुर कार्कीको नेतृत्वमा घटनास्थलमा खटिएको थियो।

घाइते बालबन्दीको नेपालगञ्ज मेडिकल कलेज शिक्षण अस्पतालमा उपचार भइरहेको छ। झडपका बेला केही बालबन्दी भागेका छन् भने उनीहरूको खोजी कार्य जारी रहेको प्रहरीले जनाएको छ।

हाल सुधारगृहमा करिब २५० बालबन्दी रहेका छन्, र त्यहाँ विगतमा पनि पटक–पटक झडपका घटना दोहोरिइरहेका छन्। प्रहरीले सुधारगृहमा पूर्ण नियन्त्रण कायम गरिसकेको जनाएको छ।