भोजपुर, चैत ४ – भोजपुर जिल्लाको भोजपुर नगरपालिका–१२ मा रहेको इनामे सामुदायिक वनबाट सुरु भएको भीषण आगलागीले ठूलो क्षति पुर्याएको छ। पारपाने टङटङ्गे डाँडाबाट सुरु भएको आगो बस्तीमा फैलिँदा ८ वटा घर र पाली जलेर पूर्ण रूपमा नष्ट भएका छन्।
आगलागीबाट स्थानीय कालीदास चपागाईंको पाली, सोभित श्रेष्ठको घर र पाली, गोपीकृष्ण धमलाको पाली, गोविन्द चापागाईंको पाली, रुद्रप्रसाद ढकालको घर र पाली, गोमा दमाईको घर, रामबहादुर कार्कीको घर र पाली तथा शंकर धमलाको घर जलेर नष्ट भएको जिल्ला प्रहरी कार्यालय भोजपुरले जनाएको छ।
नेपाल प्रहरी, सशस्त्र प्रहरी बल, नेपाली सेना र स्थानीय बासिन्दाहरूले आगो नियन्त्रणमा लिने प्रयास गरिरहे पनि सो क्षेत्रको हावाहुरीका कारण आगो नियन्त्रणमा आउन सकेको छैन। आगो अझै पनि पूर्ण रूपमा निभ्न नसकेको र क्षतिको विस्तृत विवरण संकलन कार्य जारी रहेको प्रहरी स्रोतले जनाएको छ।
प्राकृतिक विपत्तिबाट भएको यो क्षतिले स्थानीयहरूमा त्रास फैलिएको छ भने तत्कालीन राहत तथा पुनःस्थापनाका लागि स्थानीय प्रशासन र सरोकारवाला निकायहरूसँग पहल भइरहेको बताइएको छ।
.jpeg)
Posts
