चैत ७, नवलपरासी पश्चिम – प्रहरीले अवैध हुन्डी कारोबारको आशङ्कामा १२ लाख रुपैयाँसहित दुई व्यक्तिलाई पक्राउ गरेको छ। पक्राउ पर्नेमा पाल्हीनन्दन गाउँपालिका–२, भक्सिपुरका २२ वर्षीय सुख सागर यादव र प्रतापपुर गाउँपालिका–८, पिपरपातीका ३९ वर्षीय शिवेन्द्र प्रसाद बनिया रहेका छन्।
जिल्ला प्रहरी कार्यालय नवलपरासीका सूचना अधिकारी तथा प्रहरी निरीक्षक नारायण थापाका अनुसार बरामद गरिएको नगद रकमको वैध स्रोत नखुलेपछि उनीहरूलाई अवैध वित्तीय कारोबारमा संलग्न भएको आशङ्का गरिएको हो।
प्रहरीले दुवै जनाको साथबाट छुट्टाछुट्टै ६–६ लाख नगद र भारतीय नम्बर प्लेट भएका दुईवटा मोटरसाइकल समेत बरामद गरेको छ। भारतबाट नेपालतर्फ हुन्डीमार्फत रकम भित्र्याइएको विशेष सूचनाका आधारमा खटिएको प्रहरी टोलीले रामग्राम नगरपालिका–५ स्थित बाइपास चोकबाट उनीहरूलाई नियन्त्रणमा लिएको हो।
हाल दुवै जनाविरुद्ध नवलपरासी जिल्ला अदालतबाट म्याद थप गरी हुन्डी कारोबारसम्बन्धी आरोपमा थप अनुसन्धान भइरहेको प्रहरीले जनाएको छ।
.jpeg)
Posts
