पोखरा, ८ मार्च – ११५ औँ अन्तर्राष्ट्रिय नारी दिवसको अवसरमा पोखरा–१५, नयाँ गाउँस्थित सेन्ट मेरिज स्कुलका शिक्षक, शिक्षिका तथा कर्मचारीहरूले पोखराका विभिन्न वृद्धाश्रममा खाद्यान्न वितरण र सरसफाइ कार्यक्रम सम्पन्न गरेका छन्।
विद्यालयका प्राचार्य सिस्टर जे सी सिजेको नेतृत्वमा पोखरा–१७, सीतापाइला स्थित पोखरा वृद्धाश्रममा खाद्यान्न वितरण तथा सरसफाइ कार्यक्रम सम्पन्न भएको थियो।
त्यसै गरी, पोखरा–१४, बाच्छ बडुवामा रहेको बादशायन वृद्धाश्रममा विद्यालयकी मेनेजर सिस्टर निना सिजेको नेतृत्वमा कार्यक्रम सञ्चालन गरिएको थियो।
विद्यालयका शिक्षक सुमन अधिकारीका अनुसार, कार्यक्रममा वृद्धाश्रमका बासिन्दाहरूसँग आत्मीय संवाद गर्दै उनीहरूलाई आवश्यक खाद्यान्न सामग्री हस्तान्तरण गरिएको थियो। साथै, संस्थाका वरपर सरसफाइ गरी स्वस्थ वातावरणको महत्वबारे जागरूकता फैलाइएको थियो।
यस कार्यक्रममा विद्यालयका शिक्षक, शिक्षिका तथा कर्मचारीहरूको सक्रिय सहभागिता रहेको थियो। सामाजिक सेवाका यस्ता कार्यहरू भविष्यमै निरन्तर गरिने विद्यालय प्रशासनले जनाएको छ।
.jpeg)
Posts
