तनहुँ, चैत २ – तनहुँको व्यास नगरपालिका–६ शान्तिटोलमा विषालु च्याउ सेवन गर्दा दश जना बिरामी परेका छन्। म्याग्दे गाउँपालिका–६ सर्वलाङका ३० वर्षीय नारायण मगरले बारीमा उम्रिएको च्याउ टिपेर शान्तिटोलस्थित मामाघरमा लगेर पकाएर खाँदा सबै बिरामी परेका हुन्।
बिरामी हुनेहरूमा ६३ वर्षीय गुरुबहादुर पुलामी, ३१ वर्षीय सुरेन्द्रबहादुर पुलामी, ३० वर्षीय नारायण मगर, २३ वर्षीया पवित्रा मगर, ४२ वर्षीय तिलबहादुर थापा मगर, ६६ वर्षीय चक्रबहादुर पुलामी, १८ वर्षीया आरती पुलामी, ३६ वर्षीय केशव पुलामी, ६५ वर्षीया सीता पुलामी र चार वर्षीय सविन पुलामी रहेका छन्।
शुक्रबार साँझ च्याउ सेवन गरेपछि स्वास्थ्यमा समस्या देखिएपछि उनीहरूलाई उपचारका लागि प्रदेश अस्पताल दमौली लगिएको थियो। हाल सबैको अवस्था खतरामुक्त रहेको जिल्ला प्रहरी कार्यालय तनहुँका प्रहरी निरीक्षक विकास पासवानले जानकारी दिनुभएको छ।
प्रहरीले प्राकृतिक रूपमा उम्रिएका च्याउ सेवन गर्दा विषाक्त हुने सम्भावना हुने भएकाले सावधानी अपनाउन आग्रह गरेको छ।
.jpeg)
Posts
