पर्वत, फागुन २८ — वैदेशिक रोजगारसम्बन्धी ठगी मुद्दामा अदालतबाट दोषी ठहर भई सजाय तोकिए पनि फरार रहेका पूर्व सांसद मिठा राम विश्वकर्मा ६ वर्षपछि पक्राउ परेका छन्।
पर्वत जिल्ला, कुस्मा नगरपालिका–८ चुवा स्थायी घर भई हाल काठमाडौं महानगरपालिका–१६, वनस्थलीमा लुकिछिपी बस्दै आएका ७२ वर्षीय विश्वकर्मालाई जिल्ला प्रहरी कार्यालय पर्वतले फागुन २७ गते पक्राउ गरेको हो।
२०७५ साल माघ २८ गते वैदेशिक रोजगार न्यायाधिकरणले सुनाएको फैसलाअनुसार उनलाई १ वर्ष २१ दिन कैद र जरिवाना असुल उपर गर्न बाँकी थियो। अदालतको फैसलापछि फरार भएका विश्वकर्मालाई प्रहरी नायब उपरीक्षक (डीएसपी) रबिन विष्टको नेतृत्वमा गरिएको अनुसन्धानपछि नियन्त्रणमा लिइएको प्रहरीले जनाएको छ।
पक्राउ परेपछि उनलाई पर्वत जिल्ला अदालतमा उपस्थित गराइ कानुनी प्रक्रिया पुरा गरी पर्वत कारागार चलान गरिएको डीएसपी विष्टले जानकारी दिनुभयो।
मिठा राम विश्वकर्मा नेपाली कांग्रेसको तर्फबाट २०६४ सालमा बनेको अन्तरिम संसदका सदस्यसमेत भइसकेका हुन्। उनलाई पक्राउ गर्दै प्रहरीले वैदेशिक रोजगार ठगीका फरार प्रतिवादीहरूलाई खोजी गर्न थालेको अभियान अझ सशक्त बनाएको संकेत मिलेको छ।
जिल्ला प्रहरी कार्यालय पर्वतले फरार अभियुक्तहरूलाई कानूनको दायरामा ल्याउने कामलाई निरन्तरता दिइरहेको जनाएको छ।
.jpeg)
Posts
