कालीमाटी फलफूल तथा तरकारी बजार समितिका अनुसार, सोमबार विभिन्न १४ प्रकारका तरकारीको नमुना परीक्षण गर्दा भक्तपुरबाट आएको ब्रोकाउलीमा ८८.६७० प्रतिशत अगार्नोफस्फेट विषादी रहेको पुष्टि भएको छ। अत्यधिक विषादीयुक्त भएकाले बाँकी ब्रोकाउली प्रहरीको रोहबरमा नष्ट गरिएको छ।
समितिका अनुसार, अघिल्लो सोमबार पनि भक्तपुरबाट ल्याइएको ब्रोकाउलीमा खान नहुने मात्रामा विषादी फेला परेको थियो। चैत १ देखि ११ गतेसम्म गरिएको १३० वटा तरकारी नमुनाको परीक्षणमा सात वटा पूर्ण रूपमा अस्वस्थकर रहेको देखिएको छ।
त्यस्तै, नौ वटा नमुनामा केही दिन राखेपछि मात्र खान मिल्ने विषादीको मात्रा देखिएको छ, जसमा धेरैजसो गोलभेँडा परेका छन्। विषादीको सुरक्षित उपभोग दर ३५ प्रतिशतभन्दा कम मानिन्छ, ३५–४५ प्रतिशतसम्मको विषादी भएमा केही दिन पर्खिएर खान सकिन्छ, तर ४५ प्रतिशतभन्दा बढी भएमा पूर्ण रूपमा अयोग्य ठहरिन्छ।
केन्द्रीय कृषि प्रयोगशालाका प्रमुख डा. शान्ता कार्कीका अनुसार, विषादी छर्किएपछि अनिवार्य रूपमा पर्खिनुपर्ने समय (वेटिङ पिरियड) नपर्खी सोझै तरकारी बजारमा पठाइएकाले विषादीको मात्रा अत्यधिक देखिएको हो। उनले उपभोक्ताहरूलाई सचेत रहन आग्रह गर्दै, तरकारी खरिद गर्दा राम्रोसँग सफा गरी मात्र उपभोग गर्न सुझाव दिएकी छन्।
.jpeg)
Posts
