पोखरा, फागुन १६ – कास्कीको पोखरा–८ न्युरोडस्थित शर्मा आईटी हबमा आगलागी भएको घटनामा पसल सञ्चालक स्वयं संलग्न रहेको आशंकामा प्रहरीले उनलाई पक्राउ गरेको छ।
२०७८ फागुन १६ गते साँझ करिब ७:०५ बजे आगलागी भएको सूचना पाएलगत्तै वडा प्रहरी कार्यालय बैदाम र जिल्ला प्रहरी कार्यालय कास्कीबाट खटिएको टोलीले दमकलको सहयोगमा आगो करिब ७:४५ बजे पूर्ण रूपमा नियन्त्रणमा लिएको थियो। घटनास्थलमा पुगेको प्रहरीले पसल पूर्णरूपमा जलेको अवस्थामा फेला पारेको थियो।
आगलागीपछिको अनुसन्धानमा संलग्न सुरक्षा निकायले पसल सञ्चालक पोखरा–८ का २८ वर्षीय रमेश शर्मा लोहारलाई नियन्त्रणमा लिएको छ। उनले आगलागीबाट रु. ९४ लाख बराबरको क्षति भएको भन्दै वडा प्रहरी कार्यालय बैदाममा निवेदन दिएका थिए। शर्मा आईटी हब उनले गत पुष महिनादेखि ब्लक र टिनको टहरामा मासिक रु. ३५ हजारमा भाडामा लिएर सञ्चालन गर्दै आएका थिए।
पसलमा कार्यरत दुई जना कामदार घटनाको दिन बिदामा थिए र पसल पनि दुई दिनदेखि बन्द रहेको प्रहरीले जनाएको छ।
शर्माले उक्त पसल शिखर इन्स्योरेन्स कम्पनीमा रु. १ करोड बराबरको बीमा गरेका थिए। आगलागी भएको तीन दिनपछि अर्थात् फागुन १९ गते उनले मोबाइल चार्जमा राखेर वासरुम गएको र त्यसक्रममा पड्किएको आवाज आएपछि आगो लागेको भनी इन्स्योरेन्समा बीमा दाबी निवेदन दिएका थिए।
तर घटनास्थलको प्रारम्भिक अध्ययन र प्रमाण संकलनका क्रममा आगो मानवीय र विद्युतीय दुवै माध्यमबाट लाग्न सक्ने देखिएको छ। साथै, प्रहरीको अनुसन्धानमा उनले तालचोकमा सञ्चालन गरेको अर्को पसलसमेत संलग्न रहेर अध्ययन भइरहेको छ।
अनुसन्धानबाट प्राप्त प्रमाण र तथ्यको आधारमा प्रहरीले बीमा रकम असुल गर्न दुषित मनसायले उनले आफ्नै पसलमा आगो लगाएको ठहर गर्दै ‘आपराधिक प्रवेश’ र ‘आपराधिक उपद्रव’ सम्बन्धी कसूरमा उनलाई कास्की जिल्ला अदालतबाट ७ दिनको म्याद थप गरी थप अनुसन्धान अगाडि बढाएको जनाएको छ।
.jpeg)
Posts
