घटना शुक्रवार राति भएको हो। बिहान घाँस हाल्न गोठ पुगेका किसान राईले गोरु मृत अवस्थामा भेटे। गोरुको खुट्टाको फिलाबाट करीब पाँच किलो मासु क्रूर रूपमा काटिएको थियो। यसअघि पनि यही गोरुलाई लक्षित गरी यस्तै तरिकाले मासु काटिएको थियो। औषधोपचार गरिएपछि गोरु बाँच्ने स्थितिमा थियो, तर दोहोरिएको आक्रमणले अन्ततः ज्यान गयो।
किसान राईको भनाइमा, गोठ घरबाट केही पर रहेकाले रातिको समयमा कसैले यस्ता क्रियाकलाप गर्ने मौका पाउँछन्। यस्तै घटनाका कारण उनको अर्को गोरु पहिल्यै मरेको थियो। हाल पुनः दोस्रो गोरु पनि मरेपछि उनको गोठमा कुनै गोरु बाँकी छैन। अर्काको जमिन भाडामा लिएर खेतीपाती गर्दै आएका राईका लागि यो घटना गम्भीर आर्थिक संकट पनि हो।
यस प्रकारको हृदयविदारक र क्रूर घटनाले स्थानीयहरूमा त्रास फैलिएको छ। उनीहरूले तत्काल प्रहरीलाई जानकारी गराएका छन्। जिल्ला प्रहरी कार्यालय इलामका डीएसपी मानबहादुर राईका अनुसार घटनाका सम्बन्धमा अनुसन्धान सुरु गरिएको छ, तर हालसम्म अपराधीको पहिचान हुन सकेको छैन।
.jpeg)
Posts
