भन्सार कार्यालयका अनुसार भारतको राजस्थान राज्यको नम्बर प्लेट आरजे १४ जिएच ०४३३६ भएका दुई ट्रकमध्ये एक उद्योगमा सामान अनलोड गरेर फर्किंदै गर्दा गेटमा इन्ट्री भएको थियो भने अर्काे ट्रक भन्सार परिसरमा पार्किङमा रोकिएको अवस्थामा भेटिएको थियो। दुवै ट्रक एउटै समयको आसपासमा देखिएपछि शंका उब्जिएको हो।
विराटनगर भन्सार कार्यालयका प्रमुख उमेश श्रेष्ठले राजस्व छलीको आशङ्कामा दुवै ट्रक नियन्त्रणमा लिइएको जानकारी दिनुभयो। उहाँका अनुसार यस्तो परिस्थिति कसरी उत्पन्न भयो भन्ने विषयमा अनुसन्धान गर्न अधिकृत तोकिएको छ।
दुवै ट्रकमा मोरङको कटहरी गाउँपालिकामा रहेको काबरा ग्रुप अन्तर्गतको क्वालिटी केम प्रालि को सामान रहेको बताइएको छ।
भन्सार कार्यालयका मुद्दा शाखा प्रमुख फर्सबहादुर राईका अनुसार अनलोड भएर फर्किएको ट्रक गेटमा इन्ट्री गर्ने क्रममा भन्सार पार्किङमा उभिएको अर्को ट्रक पनि सोही नम्बरको देखिएपछि प्रणालीले जानकारी दिन थालेको हो। प्रणालीमा एउटै नम्बरका दुई ट्रक देखिएपछि तत्काल खोजी थालिएको र अनुसन्धान अघि बढाइएको उहाँले बताउनुभयो।
विराटनगर भन्सार एजेन्ट संघका अध्यक्ष देवकीनन्दन शर्माले भारतमा चोरीका गाडीहरू प्रायः चल्ने गरेको र सोही गाडी नेपाल प्रवेश गरी भन्सार प्रक्रियामा दुरुपयोग हुनसक्ने सम्भावना औंल्याउनुभयो। यद्यपि हालसम्म ठोस प्रमाण फेला नपरेको हुँदा यसबारे ठोस निष्कर्ष निकाल्न नसकिने उहाँको भनाइ छ।
काबरा ग्रुपका प्रतिनिधि विपिन काबराले यो घटना आफूहरूका लागि पनि अनपेक्षित रहेको र यकिन नभएको प्रतिक्रिया दिनुभयो। “एउटा ट्रक खाली छ भनेको छ, अर्कोमा सामान छ भनिएको छ,” उहाँले भने, “यस विषयमा अझै बुझ्न बाँकी छ।”
भन्सार कार्यालयले घटनालाई गम्भीर रूपमा लिएर प्रक्रिया अघि बढाएको जनाएको छ। यदि एउटै नम्बर प्लेट प्रयोग गरेर प्रज्ञापनपत्रको दुरुपयोग गरिएको पुष्टि भएमा यो ठूलो राजस्व छलीको घटनाका रूपमा अगाडि आउने सम्भावना रहेको छ।
.jpeg)
Posts
