तातोपानी भन्सारमा आठ महिनादेखि थन्किएको १३ सय मेट्रिक टन रासायनिक मल प्रयोगहीन अवस्थामा - Brighter Network

फागुन २८, तातोपानी — तातोपानी सुक्खा बन्दरगाह भन्सार कार्यालयमा झण्डै आठ महिनादेखि थन्किएको १३०० मेट्रिक टन रासायनिक मल प्रयोग नहुने अवस्थामा पुगेको छ। खुला गोदाममा राखिएको ५० किलोका २६०० बोरा मल बिग्रिएर अब बालीमा प्रयोग गर्न नसकिने भएको हो।

तातोपानी भन्सारका अधिकृत सूर्यप्रसाद काफ्लेका अनुसार कृषि सामग्री कम्पनी र मल आयातकर्ता कम्पनीबीच मूल्य निर्धारणको विषयमा विवाद हुँदा मल भन्सारमै अड्किएको हो। चीनबाट ‘सिनोम्याक्स/सिल्क मार्केट’ र अर्को एक कम्पनीको जोइन्ट भेन्चरमार्फत आयात गरिएको यो मल विवादका कारण प्रयोगमा आउन सकेको छैन।

गत वर्ष पनि यस्तै मल करिब डेढ वर्षसम्म त्यहीँ थन्किएको थियो, जुन पछि आपसी सहमतिमा राजधानी पुर्याइएको थियो। तर यसपटक भने मूल्य विवादले विवाद उच्च अदालतसम्म पुगेको छ। अदालतले दुबै पक्षलाई आपसी सहमतिबाट समाधान निकाल्न आदेश दिएको भए पनि हालसम्म कुनै टुंगो लाग्न सकेको छैन।

भन्सार कार्यालयले न जफत गर्न पाएको छ, न राजधानी पठाउन सकेको छ। भन्सार ऐनअनुसार भन्सारले जाँचपासबाहेक जफत गर्ने अधिकार राख्दैन। यसै कारण भन्सारले कृषि सामग्री केन्द्र र आयातकर्तालाई विवाद टुंग्याएर प्रक्रिया अघि बढाउन पटक–पटक आग्रह गर्दै आएको छ।

कृषि सामग्री केन्द्रले मल परीक्षणका लागि ल्याब टेष्ट गराउने जिम्मा लिएको छ। परीक्षणपछि मात्रै मल प्रयोगयोग्य हो वा होइन भन्ने निश्चित हुने भन्सारले जनाएको छ। भन्सार अधिकृत काफ्लेले सबै प्रक्रिया पूरा भएर आएमा जाँचपास गरिने स्पष्ट पारे।

तर हालसम्म दुई पक्षबीच सहमति नजुटेकाले मल भन्सारकै गोदाममा थन्किएको छ। गोदाम ठाउँ अभावका कारण अरू सामान भण्डारण गर्न समेत समस्या भइ रहेको भन्सार कार्यालयको भनाइ छ। यसबीच कृषकहरू भने मलको अभावमा बालीमा सिँचाइ गर्न सकिरहेका छैनन्।