काठमाडौं, चैत ३। काठमाडौंको स्वयम्भूस्थित बा ५ ख ७३१४ नम्बरको सवारीसाधनबाट भन्सार चोरी गरी ल्याइएका औषधी तथा कपडासहित तीन जना पक्राउ परेका छन्। पक्राउ पर्नेमा कृष्ण गोपाल श्रेष्ठ, हरि बहादुर श्रेष्ठ र पुरुषोत्तम कोईराला रहेका छन्।
जिल्ला प्रहरी परिसर, काठमाडौंबाट खटिएको टोलीले २०८१ साल चैत १ गते राति २:१५ बजे सूचना प्राप्त भएपछि उक्त गाडीलाई नियन्त्रणमा लिएको हो। रितपूर्वक खानतलासी गर्दा गाडीमा करिब २ करोड ७५ लाख ११ हजार ४ सय १८ रुपैयाँ बराबरको भन्सार चोरी गरी ल्याइएका विभिन्न औषधी र कपडा फेला परेको प्रहरीले जनाएको छ।
पक्राउ पर्नेहरूमा काभ्रेपलाञ्चोक जिल्ला डराउनेपोखरी गा.वि.स. वडा नं. २ स्थायी घर भई हाल ललितपुर महानगरपालिका–२१ पाटन बसोबास गर्दै आएका ३१ वर्षीय कृष्ण गोपाल श्रेष्ठ, दोलखा मेलुङ गाउँपालिका–८ का ६१ वर्षीय हरि बहादुर श्रेष्ठ, र नुवाकोट बिदुर नगरपालिका–१२ का ४२ वर्षीय पुरुषोत्तम कोईराला रहेका छन्।
पक्राउ परेका तिनै जनालाई गाडी र बरामद सामानसहित आवश्यक कारवाहीको लागि आन्तरिक राजस्व कार्यालय, ललितपुर पठाइएको प्रहरीले जानकारी दिएको छ।
Posts
