काठमाडौं, २०८१ चैत १६ – समाचार सङ्कलनका क्रममा पत्रकारको हत्या गरिएको घटनाको विरोधमा पत्रकारहरूले माइतीघर मण्डलामा विरोध प्रदर्शन गरेका छन्। सञ्चारमाध्यममाथि भएको आक्रमणको कडा विरोध गर्दै दोषीलाई कडा कारबाहीको माग गरिएको छ।
शनिबार बिहान आयोजित विरोध प्रदर्शनमा सयौं पत्रकार तथा सञ्चारकर्मी सहभागी भएका थिए। पत्रकार महासङ्घका प्रतिनिधिहरूले स्वतन्त्र पत्रकारितामाथि बढ्दो खतरा तथा हिंसाका घटनाहरूविरुद्ध सरकारको गम्भीर ध्यानाकर्षण गराएका छन्। उनीहरूले घटनाको विस्तृत छानबिन गरी दोषीलाई कानुनी कारबाही गर्न जोडदार माग गरेका छन्।
शुक्रवार राजधानीमा भएको राजावादी प्रदर्शनका क्रममा भिडियो खिचिरहेका पत्रकार सुरेश रजकमाथि आक्रमण भएको थियो। प्रदर्शनकै बीच तीनकुनेस्थित मार्वल हाउसमा सुरेश रजक समाचार सङ्कलन गरिरहेका बेला प्रदर्शनकारीहरूले आगजनी गरेका थिए, जसका कारण उहाँ घटनास्थलमै जलेर मृत्यु भएका थिए।
यो घटनाले सञ्चार जगतलाई ठूलो झट्का दिएको छ। पत्रकार महासङ्घका अध्यक्षसहित विभिन्न सञ्चारकर्मी तथा मानवअधिकारवादी संस्थाहरूले घटनाको निन्दा गर्दै प्रेस स्वतन्त्रताको सुरक्षा गर्न सरकारलाई आग्रह गरेका छन्।
विरोध प्रदर्शनमा सहभागी पत्रकारहरूले प्रेस स्वतन्त्रता कुण्ठित गर्ने कुनै पनि गतिविधि स्वीकार्य नहुने बताए। उनीहरूले सरकारले छानबिन समिति गठन गरी घटनामा संलग्न दोषीलाई कानुनी दायरामा ल्याउनु पर्ने माग राखेका छन्। साथै, भविष्यमा पत्रकारहरूलाई निशाना बनाउने कुनै पनि गतिविधि हुन नदिन सरकारलाई खबरदारी गरिएको छ।
.jpeg)
Posts
