काठमाडौँ, शुक्रबार – काठमाडौँको विभिन्न स्थानबाट स्कुटर चोरीमा संलग्न दुई युवकलाई काठमाडौँ उपत्यका ट्राफिक प्रहरी कार्यालयबाट खटिएको प्रहरी टोलीले नियन्त्रणमा लिएको छ।
पक्राउ पर्नेमा सिन्धुपाल्चोकको बाह्रबिसे नगरपालिका–७ घर भई हाल काठमाडौंको मनमैजुमा बस्दै आएका २० वर्षीय शनिस श्रेष्ठ र रुकुमपूर्वको पुथा उत्तरगंगा गाउँपालिका–१३ का १८ वर्षीय सुशान्त बुढा मगर रहेका छन्।
प्रहरीका अनुसार वास्तविक नम्बर बा ८७ प १६४४ भएको स्कुटर बिना नम्बर प्लेट तार्केश्वर नगरपालिका–१० को घलेपुलमा चलाइरहेको अवस्थामा फेला परेको थियो। स्कुटर सामाखुसीका महेशचन्द्र खनालको रहेको र तारकेश्वर नगरपालिका–९ बाट हराएको भनी उनले प्रहरीमा निवेदन दिएका थिए। प्रारम्भिक अनुसन्धानमा सो स्कुटर सुशान्त बुढा मगरले दिएको खुलेपछि प्रहरीले उनलाई पनि मनमैजुबाट पक्राउ गरेको हो।
अर्को स्कुटर पनि लुकाइएको भन्ने जानकारीका आधारमा थप अनुसन्धान गर्दा तार्केश्वर नगरपालिका–१० कै घलेपुल क्षेत्रमा नम्बर प्लेट नभएको अवस्थामा पार्किङ गरी राखिएको अर्को स्कुटर पनि फेला परेको हो। उक्त स्कुटर वास्तविक नम्बर बा ९२ प ९३९५ रहेको र टोखा नगरपालिका–११ बाट हराएको भनी रामेछापका रिकी थापा मगरले निवेदन दिएका थिए।
पक्राउ परेका दुबै जनालाई थप अनुसन्धानका लागि प्रहरी वृत्त बालाजु पठाइएको काठमाडौँ उपत्यका ट्राफिक प्रहरी कार्यालयका प्रहरी उपरीक्षक दीपक गिरीले जानकारी दिए।
.jpeg)
Posts
