कामको खोजी विदेशतिर : वैदेशिक रोजगारीमा जाने नेपालीको संख्या १७ प्रतिशतले बढ्यो - Brighter Network

चैत ६ – वैदेशिक रोजगारीका लागि विदेशिने नेपालीको संख्या अघिल्लो वर्षको तुलनामा १७ प्रतिशतले वृद्धि भएको छ। वैदेशिक रोजगार विभागका अनुसार चालु आर्थिक वर्ष २०८१/८२ को पहिलो आठ महिनामा ५ लाख ४४ हजार ५७० जनाले श्रम स्वीकृति लिएका छन्। यो संख्या अघिल्लो वर्ष सोही अवधिमा श्रम स्वीकृति लिएका ४ लाख ६२ हजार ४६९ जनाको तुलनामा ८२ हजार १०१ ले बढी हो।

विभागका अनुसार चालु आवमा मङ्सिर महिनामा सबैभन्दा बढी ८४ हजार २२७ जनाले श्रम स्वीकृति लिएका छन् भने असोजमा सबैभन्दा कम ५३ हजार ४२५ जनाले स्वीकृति लिएका थिए। माघमा ७२ हजार ४४१ र फागुनमा ६८ हजार ९६३ जनाले विदेश जाने अनुमति पाएका छन्।

वैदेशिक रोजगारीका लागि नेपाली कामदारको पहिलो रोजाइ संयुक्त अरब इमिरेट्स (युएई) बनेको छ। चालु वर्षको पहिलो आठ महिनामा युएईमा १ लाख ७३ हजार ३४१ नेपालीले श्रम स्वीकृति लिएका छन्। दोस्रोमा साउदी अरब (१ लाख ३ हजार ९९१) र तेस्रोमा कतार (९३ हजार ४०५) रहेका छन्।

अघिल्ला वर्षहरूमा शीर्ष गन्तव्यमा रहने मलेसिया अहिले पाँचौँ स्थानमा पुगेको छ। यस वर्ष हालसम्म मलेसियाका लागि १८ हजार ८९४ जनाले श्रम स्वीकृति लिएका छन्। कुवेत चौथो स्थानमा छ, जहाँ साढे २३ हजार नेपालीले अनुमति लिएका छन्। त्यस्तै, रोजगार अनुमति प्रणाली (EPS) अन्तर्गत दक्षिण कोरिया जानेको संख्या ७ हजार ७१० रहेको छ।

विभागका निर्देशक तथा सूचना अधिकारी गुरुदत्त सुवेदीका अनुसार कोभिडपछि युएई र साउदी अरबमा उद्योग र व्यवसाय पुनः सक्रिय बनेपछि ती देशमा नेपाली कामदारको माग उच्च बनेको हो। यही कारण युएई र साउदी लगातार पहिलो र दोस्रो श्रम गन्तव्य देशको रूपमा देखिएका छन्।