काठमाडौंको गोकर्णेश्वर नगरपालिकाबाट अवैध हातहतियार र लागुऔषधसहित एक युवकलाई प्रहरीले पक्राउ गरेको छ।
फागुन २६ गते राति ११ बजे विशेष सूचनाको आधारमा गोकर्णेश्वर–२, भाड गाउँस्थित मिरा तामाङको घरमा डेरा गरी बस्ने ३३ वर्षीय सुदन जोशीको कोठामा जिल्ला प्रहरी परिसर, काठमाडौंको समन्वयमा प्रहरी वृत्त स्वयम्भूबाट खटिएको टोलीले खानतलासी गरेको थियो।
खानतलासीका क्रममा प्रहरीले एकथान पेस्तोल, दुईथान म्यागजिन, १० राउण्ड गोली, २५० ग्राम पोल्याण्ड लागुऔषध र १० वटा क्याप्सुल लागुऔषध बरामद गरेको छ।
त्यसैगरी घटनास्थलबाट काठले बनेको कालो र रातो रंगको एकथान स्पिकर, ल्यापटप, डिजिटल तराजु, सात थान विभिन्न कम्पनीका मोबाइल फोन र एकथान एप्पलको आइप्याड समेत बरामद गरिएको प्रहरीले जनाएको छ।
पक्राउ परेका जोशी विगतमा पनि पटक–पटक विभिन्न कसुरमा पक्राउ परिसकेका छन्। प्रहरी अभिलेखअनुसार उनीमाथि २०६१, २०६७ र २०६८ सालमा अभद्र व्यवहार तथा लागुऔषध सम्बन्धी कसुरमा मुद्दा दर्ता भएका थिए भने २०७४ सालमा प्रहरी वृत्त कालिमाटीबाट लागुऔषध मुद्दामा अनुसन्धान गरिएको थियो।
हाल उनलाई काठमाडौं जिल्ला अदालतबाट पाँच दिनको म्याद थप अनुमति लिई थप अनुसन्धान अगाडि बढाइएको छ।
.jpeg)
Posts
