फागुन २५, पोखरा — कास्की प्रहरीले क्रिप्टोकरेन्सी प्रयोग गर्दै अनलाइन जुवा र सट्टाबाजी सञ्चालन गरेको आरोपमा पाँच जनालाई पक्राउ गरेको छ। कास्कीका प्रहरी प्रमुख एसपी श्यामबाबु ओलियाका अनुसार फागुन २३ गते पोखरा–१४ अनुपम टोलबाट उनीहरूलाई पक्राउ गरिएको हो।
यो कास्की जिल्लामा क्रिप्टोकरेन्सी र अनलाइन जुवासम्बन्धी पहिलो पक्राउको घटना हो। पक्राउ पर्नेमा पर्वत, म्याग्दी र पोखराका स्थायी बासिन्दाहरू रहेका छन् — रुपेन्द्र जिसी (३१), विक्रम बानिया (३३), सञ्जन घिमिरे (२२), रोजन केसी (१९) र सन्दीप कटवाल (२८)।
नेपाल प्रहरी प्रदेश र जिल्ला कार्यालयको टोलीले गरेको अनुसन्धानमा उनीहरू नातेदार भएको र झण्डै ३० करोड रुपैयाँबराबरको कारोबार गरेको प्रारम्भिक अनुमान गरिएको छ। अनुसन्धानको क्रममा प्रहरीद्वारा कम्प्युटर, मोबाइल, ल्यापटप, पेनड्राइभ र आइप्याडजस्ता इलेक्ट्रोनिक सामग्री बरामद गरिएको छ।
अमेरिकामा १० वर्षसम्म बसेका आइटी इन्जिनियर रुपेन्द्र जिसीको नेतृत्वमा तीन सिफ्टमा अनलाइन जुवा सञ्चालन भइरहेको खुलेको प्रहरीले जनाएको छ। हाल उनीहरूविरुद्ध अभौतिक मुद्रा प्रयोग तथा अनलाइन जुवा/सट्टाबाजीसम्बन्धी कसूरमा अनुसन्धान जारी छ। कास्की जिल्ला अदालतबाट ७ दिनको म्याद थप गरिएको छ।
प्रहरीले थप प्रमाण संकलनका लागि अनुसन्धान जारी रहेको जनाएको छ।
.jpeg)
Posts
