चैत ९ गते, दाङ — घोराही–तुलसीपुर सडक खण्डमा दुई मोटरसाइकल एकआपसमा ठोक्किँदा एक जनाको मृत्यु भएको छ भने अर्का एकजना गम्भीर घाइते भएका छन्।
जिल्ला प्रहरी कार्यालय दाङका अनुसार शनिबार बिहान करिब पौने ५ बजेतिर गुज्रेखोला नजिक भएको दुर्घटनामा तुलसीपुर उपमहानगरपालिका–६ गाइडहरका २२ वर्षीय विवेक सुवेदीको ज्यान गएको हो। घोराहीबाट पत्रिका लिएर तुलसीपुरतर्फ जाँदै गरेका सुवेदी सवार रा ८ प ३४१ नम्बरको मोटरसाइकल र विपरित दिशाबाट आउँदै गरेको रा २ प ६१६३ नम्बरको मोटरसाइकल एकआपसमा ठोक्किएपछि दुर्घटना भएको प्रहरी निरीक्षक कविराज रोकायाले जानकारी दिनुभयो।
गम्भीर घाइते भएका सुवेदीको उपचारका क्रममा राप्ती स्वास्थ्य विज्ञान प्रतिष्ठानमा निधन भएको हो। दुर्घटनामा रा २ प ६१६३ नम्बरको मोटरसाइकल चालक घोराही–११ का ३४ वर्षीय दीपक बस्नेत पनि गम्भीर घाइते भएका छन्। उनको सोही अस्पतालमा उपचार भइरहेको प्रहरीले जनाएको छ।
.jpeg)
Posts
