फागुन २७, काठमाडौं – भक्तपुरको शिवशिखर बहुउद्देश्यीय सहकारी संस्था लिमिटेडको विभिन्न जिल्लामा रहेको चल–अचल सम्पत्तिको लिलामी प्रक्रिया अघि बढेपछि सहकारीका हजारौं बचतकर्ता आफ्नो बचत फिर्ता हुने नहुने भन्ने चिन्तामा परेका छन्।
नेपाल एसबिआई बैंकले फागुन २१ गते सार्वजनिक सूचना जारी गर्दै शिवशिखरसँग सम्बन्धित कम्पनीहरूको नाममा रहेका सम्पत्ति लिलामी प्रक्रिया सुरु गर्ने जानकारी गराएको हो।
जेलमा सञ्चालक, संकटमा सहकारी
शिवशिखरका निवर्तमान अध्यक्ष तथा मोरङस्थित तुलसी बहुमुखी सहकारीका अध्यक्ष केदारनाथ शर्मा र उनकी पत्नी गीता शर्माले सहकारीको शाखा विस्तारको नाममा ठूलो मात्रामा बचत रकम दुरुपयोग गरेको आरोपमा जेल चलान भएका छन्।
शिवशिखर सहकारीमा ३२,६१३ जना बचतकर्ताको ९ अर्ब ४९ करोडभन्दा बढी रकम अपचलन भएको छ भने तुलसी सहकारीका ५,४४३ जना बचतकर्ताको १ अर्ब ५५ करोडभन्दा बढी रकम दुरुपयोग भएको पाइएको छ।
दुवै सहकारीमा गरी ११ अर्ब ५ करोड रुपैयाँभन्दा बढी रकम अपचलन भएको तथ्यांक सार्वजनिक भएको छ।
लिलामीमा हजारौं वर्गमिटर जग्गा र उद्योगहरू
नेपाल एसबिआई बैंकले चैत ११ गते बोलपत्र खोल्ने जनाउँदै केदारनाथ शर्मासँग सम्बन्धित कम्पनीहरू – शिखर अर्गनाइजेसन लिमिटेड, शिखर स्पाइस एन्ड फ्रुट इन्डस्ट्रीज प्रालि, नटराज फुड इन्डस्ट्रीज प्रालि र शिवशिखर खाद्य उद्योग प्रालि को नाममा रहेको सम्पत्ति लिलामी गर्न लागेको हो।
काठमाडौँको बत्तीसपुतलीमा रहेको १ रोपनी ५ आना ३ दाम जग्गा, चितवनको भरतपुर र हाजीपुरमा रहेका तीन वटा औद्योगिक प्लटहरू, र बाँकेको शमशेरगन्ज तथा टिटिहिरियामा गीता शर्माको नाममा रहेको ११ हजार वर्गमिटरभन्दा बढी जग्गा र संरचना लिलामीमा राखिएको छ।
सहकारी मन्त्रालयको प्रतिक्रिया
सहकारी तथा गरिबी निवारण मन्त्रालयअन्तर्गत समस्याग्रस्त सहकारी व्यवस्थापन समितिका सदस्य सचिव केशवप्रसाद पौडेलले बैंकको लिलामी प्रक्रियाले बचत फिर्ता गर्ने प्रयासमा असर पार्न सक्ने बताउनुभयो।
“बचतकर्तालाई रकम फिर्ता गर्न कसरत भइरहेको बेला बैंकले लिलामीको सूचना जारी गर्दा समाधान प्रक्रिया प्रभावित हुन्छ,” उहाँले भन्नुभयो, “लिलामीबाट उठेको रकम व्यवस्थापन समितिको कोषमा जम्मा गर्ने व्यवस्था मिलाएर मात्र उचित समाधान सम्भव छ।”
उहाँले यस्तो दोहोरो अपचलनका घटनाले सहकारी प्रणालीमा विश्वास घटाउँदै लगेका कारण सहकारीहरूको व्यवस्थापन अझ कडाइका साथ गर्नुपर्ने धारणा राख्नुभयो।
.jpeg)
Posts
