काठमाडौं, चैत १० — दुर्लभ वन्यजन्तु सालकसँग सम्बन्धित संरक्षित अंगजस्तै देखिने सामग्रीसहित एक जना व्यक्ति काठमाडौंमा पक्राउ परेका छन्। चन्द्रागिरी नगरपालिका–४, पानीघाटस्थित चित्लाङ–थानकोट सडकखण्डमा खटिएको प्रहरी टोलीले शनिबार साँझ करिब ५ः३० बजे उनीलाई नियन्त्रणमा लिएको हो।
प्रहरी वृत्त थानकोटका अनुसार पक्राउ परेका व्यक्ति दोलखा जिल्लाको शैलुङ गाउँपालिका–६ निवासी ३२ वर्षीय सुवास तामाङ हुन्। उनी मकवानपुरको चित्लाङबाट थानकोट हुँदै काठमाडौंतर्फ आउँदै गर्दा शंकास्पद देखिएकाले प्रहरीले चेकजाँच गरेको थियो।
चेकजाँचको क्रममा तामाङले बोकेको कालो रंगको झोलाबाट सालकको खपेटा जस्तो देखिने वस्तु फेला परेको थियो। साथै, अन्य केही वन्यजन्तुजन्य सामग्रीहरू पनि बरामद गरिएका छन्। बरामद सामग्रीहरूमा सालकको खपेटा जस्तो देखिने ८ थान वस्तु, नङ्ग्रा १ थान, एकिन खुल्न नसकेको हड्डी १ थान, दुम्सीको काँडा जस्तो देखिने वस्तु ३ थान, नगद ५२ हजार रुपैयाँ र कलर्स कम्पनीको सादा मोबाइल फोन १ थान रहेका छन्।
प्रहरीले सुवास तामाङलाई उक्त वस्तुहरूसहित नियन्त्रणमा लिएर थप अनुसन्धान तथा कारबाहीका लागि डिभिजन वन कार्यालय, हात्तीसार, काठमाडौंमा बुझाएको जनाएको छ। प्रारम्भिक अनुसन्धानअनुसार उक्त वस्तुहरू वन्यजन्तु तस्करीसँग सम्बन्धित हुन सक्ने आशंका गरिएको छ।
प्रहरीका अनुसार उक्त कार्य वन्यजन्तु संरक्षण ऐनअनुसार गम्भीर अपराधमा पर्ने भएकोले तामाङमाथि आवश्यक कानुनी प्रक्रिया अघि बढाइएको छ। घटनाको विस्तृत अनुसन्धान भइरहेको जनाउँदै प्रहरीले वन्यजन्तुजन्य वस्तुको ओसारपसार र तस्करीविरुद्ध कडा निगरानी र कारबाही गर्ने जनाएको छ।
.jpeg)
Posts
