गुल्मीको छत्रकोट गाउँपालिकाले उत्कृष्ट जिपिए ल्याउने एसइई परीक्षार्थीलाई नगद पुरस्कार दिने
गुल्मी, चैत १२ – गुल्मीको छत्रकोट गाउँपालिकाले यस वर्षको माध्यमिक शिक्षा परीक्षा (एसइई) मा उत्कृष्ट ग्रेड प्वाइन्ट एभरेज (जिपिए) ल्याउने विद्यार्थीलाई नगद पुरस्कार दिने भएको छ।
गाउँपालिकाको शिक्षा समितिको निर्णयअनुसार ४ जिपिए हासिल गर्ने विद्यार्थीलाई १ लाख ५१ हजार रुपैयाँ प्रदान गरिनेछ। ३.९० देखि ३.९९ जिपिए ल्याउनेलाई ५१ हजार रुपैयाँ र ३.८० देखि ३.८९ जिपिए ल्याउनेलाई २५ हजार रुपैयाँ दिइनेछ।
छत्रकोट गाउँपालिकाका शिक्षा शाखाका प्राविधिक सहायक विनोद न्यौपानेका अनुसार यस वर्ष गाउँपालिकाका दुई परीक्षा केन्द्रबाट १०५ छात्रा र १२२ छात्र गरी कुल २२७ विद्यार्थीले एसइई परीक्षा दिइरहेका छन्।
अघिल्लो वर्ष २०८० मा १५२ छात्रा र १४४ छात्र गरी २९७ विद्यार्थी परीक्षामा सहभागी भएका थिए भने २०७९ सालमा २०० छात्रा र १५३ छात्र गरी ३५३ जनाले परीक्षा दिएका थिए।
गाउँपालिकाले सामुदायिक विद्यालयका विद्यार्थीलाई उच्च शिक्षा अध्ययनका लागि विशेष छात्रवृत्ति योजना सञ्चालन गर्दै आएको छ। २.८ जिपिए ल्याएर गाउँपालिकाभित्रकै सामुदायिक विद्यालयमा प्लस टु अध्ययन गर्ने विद्यार्थीलाई पूर्ण छात्रवृत्ति प्रदान गरिन्छ। यस्तै, गाउँपालिकाभित्र स्नातक तह अध्ययन गर्ने विद्यार्थीलाई पनि पूर्ण छात्रवृत्तिको व्यवस्था गरिएको छ।
छत्रकोटमा ९ सामुदायिक र १ संस्थागत विद्यालय गरी १० माध्यमिक विद्यालय, ४ आधारभूत विद्यालय र १४ प्राथमिक विद्यालय छन्। गाउँपालिकाले गुणस्तरीय शिक्षामा जोड दिँदै विभिन्न योजनाहरू कार्यान्वयन गरिरहेको जनाएको छ।
.jpeg)
Posts
