बैतडी, फागुन २४ – बैतडीमा लेनदेन विवादका क्रममा गोली प्रहार गरी युवकको हत्या गरेर फरार भएका कर्ण विष्ट पक्राउ परेका छन्।
गत शनिबार आफ्नै घरमा रहेको बन्दुक प्रयोग गरी कर्णले २४ वर्षीय सुरेन्द्र विष्टलाई गोली हानेका थिए। गम्भीर घाइते भएका सुरेन्द्रलाई जिल्ला अस्पताल बैतडी लैजाने क्रममा बाटोमै मृत्यु भएको थियो।
हत्यापछि फरार रहेका विष्टलाई जिल्ला प्रहरी कार्यालय बैतडीको टोलीले दार्चुलाको दत्तु पारी भारतीय क्षेत्रबाट शुक्रबार पक्राउ गरेको हो। जिल्ला प्रहरी कार्यालय बैतडीका प्रवक्ता प्रहरी निरीक्षक बल्देव बडूका अनुसार पक्राउ परेका कर्णबहादुरलाई नेपाल ल्याउने प्रक्रिया अघि बढाइएको छ।
प्रहरीका अनुसार लेनदेन विवादकै कारण कर्णले भरुवा बन्दुक प्रहार गरेका थिए। उनले सुरेन्द्रलाई ४० हजार रुपैयाँ तिर्नुपर्ने थियो, सोही विषयमा झगडा हुँदा उनले गोली प्रहार गरेका थिए। हत्यापछि कर्ण बन्दुकसहित फरार भएका थिए।
अभियुक्तको खोजीका लागि प्रहरी निरीक्षक बल्देव बडू, इलाका प्रहरी कार्यालय पाटनका प्रहरी निरीक्षक राजेन्द्र साउद तथा खोचलेक प्रहरी चौकीका प्रहरी नायब निरीक्षक गणेश कडायत नेतृत्वमा टोली परिचालन गरिएको थियो।
सात महिना अघि विवाह गरेका सुरेन्द्रको मृत्युले परिवार शोकमा छ। मृतकका दाजु नरेश विष्टका अनुसार हत्यापछि उनको परिवार बिचल्लीमा परेको छ। विशेष गरी उनकी श्रीमती र परिवारका सदस्य गम्भीर मानसिक तनावमा रहेका छन्।
प्रहरीले अभियुक्त पक्राउ परेपछि घटनाको विस्तृत अनुसन्धान अघि बढाउने जनाएको छ।
.jpeg)
Posts
